БАҚ өкілдерінің алдында кезекті есепті Сарыағаш ауданының әкімі Парманов Бұхарбай берді. Жарты жылдың жұмысын саралаған аудан басшысы 300 мыңға тарта тұрғыны бар Сарыағашта ішкі аумақтық өнім көлемі 50 млрд тенгені құрап, өткен жылмен салыстырғанда 22 пайызға артқандығын жеткізді. Оның ішінде өнеркәсіп, ауыл шаруашылығы, инвестиция көлемі және де сауда мен қызметтер жағы да 7 есеге ұлғайып отыр. Айта кетерлігі, бұл алты айда аталмыш ауданның ішкі бюджеті де 108 пайызға артығымен орындалған. Әрбір саланың нәтижелі жұмысын жіті баяндаған әкім аймақтағы шешімін таппай келе жатқан өзекті мәселелелердің де жәйін ашық айтты. Мәселен, ауыз су, табиғи газ. Бүгінге дейін барлық елді мекендердің 42 пайызы құбырлы ауыз сумен қамтылған. Ал 14 елдімекенге мембраналық су тазартқыш қондырғылары орнатылыпты.
Сондай-ақ, көршілес Өзбекстан елімен шекаралас жатқан Сарыағаш ауданында өткен жылы жаңадан логистикалық орталық ашылып өз жұмысын бастаған болатын. Яғни ауыл шаруашылығына бейім ауданның өндіретін өнімін тиімді тасымалдау, және көршілес елден келетін тауар өндірушілерге қызмет көрсету мақсатында қолға алынған мұндай жобалар бұған дейін тіпті облыстың индустрияландыру картасына енген. Осындай маңызды нысанның екіншісі биыл Сарағаш өңірінің Жылға ауылында бой көтеріп жатыр. Жобаның жалпы құны 600 млн тенгені құрайды. Жылына 648 тонна жүк айналымын өткізуге бейім орталыққа қазіргі таңда сиымдылығы үлкен қойма салынып, темір жол торабы жүргізілуде. Ал мұндай логистикалық орталықтар салуды қолға алған кәсіпкерлерге әкімдік тарапынан тиісті қолдау көрсетіліп отыр екен. Ол үшін әкімдік қажетті жер телімін берумен қатар жүзеге асқан жобаларға инфрақұрылым тартып беру жұмыстарын өз мойындарына алған.
