Елбасы ұсынған «100 нақты қадам» Ұлт жоспарының 77-ші қадамы Экономиканың алты негізгі саласы үшін он алдыңғы қатарлы колледж бен жоғары оқу орнында білікті кадрларды әзірлеу, кейіннен бұл тәжірибиені еліміздің басқа оқу орындарына таратуды міндеттейді. Міне осы бағытты жүзеге асыру мақсатында Шымкен аграрлық колледжінде Республикалық денгейдегі ғылыми-практикалық конференция өтті. «Аграрлық салада мамандарды даярлау жүйесін жаңғырту» тақырыбында өткен конференция жұмысына Білім және ғылым вице-министрі Эльмира Суханбердиева бастаған еліміздің әр аймағындағы орта арнаулы кәсіптік оқу орындарының басшылары да қатысты.
Шымкент аграрлық колледжі оңтүстік өңіріндегі ауыл шаруашылық саласына қажетті мамандар даярлайтын іргелі оқу орындарының бірі. Колледждің іргетасы 1972 жылы «Шымкент совхох-техникумы» болып құрылған. Мұнда қазір 15 мамандық бойынша 1400-ге тарта студент білім алуда. Өз алдына заман талабына сай оқу өндірістік базасы да жұмыс жасайтын алдыңғы қатарлы колледж соңғы жылдары сапалы мамандар даярлау ісіне басымдық беріп келеді. Ол үшін мұнда тәжірибиелік практикалық дәрістерге арналып 5 гектардан астам жерге 100 пайыз тамшылатып суару технологиясымен жүзім, алма сынды көкөніс түрлері, сондай-ақ тағы да басқа дәндік дақылдар егілген. Бұл бірінші кезекте болашақ мамандардың іс жүзінде тәжірибиелерін шыңдауға септігін тигізеді. Бұған қоса оқу өндірістік базасында 10 соттық жерге салынған жылыжай мен ауыл шаруашылық техникаларының да түр-түрі бар. Сондықтан-да еліміздегі алдыңғы қатарлы 10 колледждің құрамына енген оқу ордасында ұйымдастырылған Республикалық денгейдегі конференцияның мән-маңызы айрықша. Бұл ретте келелі жиынға арнайы келген білім және ғылым вице- министрі Эльмира Амангелдіқызы конференцияның негізгі мақсат міндеттеріне де тоқталып өтті.
Шымкент аграрлық колледжі Ұлттық бизнес рейтингінің қорытындысы бойынша Алтын қыран «Сапа көшбасшысы – 2015» медалімен, «Білім саласы көшбасшысы 2015» ұлттық сертификатына ие болған. Ал мұндағы бітіруші мамандардың жұмыспен қамтылуы да жоғары көрсеткішке ие. Айталық былтыр оқу ордасын 562 жас маман бітіріп шықса, соның 532-сі яғни 95 пайыздан астамы сұраныс бойынша тұрақты жұмысқа орналасқан. Елбасы ұсынған «100 нақты қадам» Ұлт жоспарының 77-ші қадамындағы он алдыңғы қатарлы колледж бен жоғары оқу орнында білікті кадрларды әзірлеу, кейіннен бұл тәжірибиені еліміздің басқа оқу орындарына таратуды жүзеге асыру бағытында білім және ғылым министрлігі тарапынан анықталған еліміздегі үздік 10 базалық колледж ішіне нақ осы Шымкент аграрлық колледжі де енген. Сондықтан да «Аграрлық салада мамандарды даярлау жүйесін жаңғырту» тақырыбындағы ғылыми-практикалық конференцияның негізгі мақсаты оқу ордасының тың жаңалықтары мен жаңашыл технологияларын өзге аймақтармен тәжірибие алмасу арқылы бөлісу болып табылады. 
Қазіргі таңда мемлекет алдында техникалық және кәсіптік білімді жаңғырту бойынша маңызды міндеттер тұр. Ал бұдан мамандарды даярлау сапасын қамтамасыз ету мақсаты туындайды. Ол үшін нақты жаңа білім бағдарламалары мен прогрессивті оқыту технологияларын енгізу қажет болып отыр. Айталық болашақ мамандарды оқыту процесінде 60 пайызға дейін тәжірибиелік білім беру мақсатын көздейтін дуалды оқыту жүйесінің маңыздылығы айрықша. Мәселен 15 мамандық түрі бойынша білім беретін Шымкент аграрлық колледжінде 8 мамандық дуалды оқыту жүйесі арқылы оқытылады. Осы орйда конференция барысында бірқатар баяндамалар тыңдалып өзекті ұсыныс пікірлер ортаға салынды. Ал өңірімізбен қатар еліміздің әр аймағынан келген орта арнаулы оқу орындарының басшылары мұндай конференциялардың өзара тәжірибие алмасуға септігі мол деп санайды.
Осылайша өрбіген Республикалық конференция жұмысына қатысқан ғалымдар мен профессорлар кәсіптік және техникалық білім берудегі оқу-өндірістік базаның дуалды оқыту жүйесіндегі маңызы, Жаңа инновациялық- агротехникалық жүйені ауыл шаруашылығына ендіру бағыты бойынша да баяндамалар жасалып п, өзекті ойлар ортаға салынды.
Абай Омар
