Асқар Мырзахметов: «Шымкенттіктер қаптап кетті деп айтып жүрмеңіздер»

Дәл қазіргі уақытта Жамбыл облысының әкімі Асқар Мырзахметовтің халық алдындағы есеп беру кездесуі өтіп жатыр. Өткен жылы өңірде атқарылған жұмыстарды қорытындылап, 2019 жылға жоспарланған тірліктерді айтып жатқан жиында кезекті сөзге шыққан Тараз қаласының тұрғыны Талғат Насыр жергілікті «Тараз» футбол клубының премьер-лигаға енуі — еселі еңбектің жемісі екендігін атап берді. Бұл тұста, облыс әкімі Асқар Мырзахметовке алғысын жеткізді. Өйткені, Түркістан облысының «Қыран», «Мақтаарал» футбол клубтарының экс-ойыншылары Тараздың атын бірінші лигада қорғауы есебінен былтыр жоғары жетістікке қол жеткізген. Енді міне, Тараз футболшылары шетелде жаттығуға мүмкіндік алды. Талғат Насырдың бұл алғысын әзілімен жалғаған Жамбыл облысының әкімі «Шымкенттіктер қаптап кетті деп айтып жүрмесеңіздер болды», — дейді.Сонымен қатар, залдан сөз алған Тараз қаласының тағы бір тұрғыны облыста атқарылған жұмыстарға өз ризашылығын білдіре отырып, соғыс ардагерлерінің құрметіне былтыр қайта жаңартудан өтіп, пайдалануға берілген саябақтардың болашақ жастарға берері мол екендігін ерекше атап берді. Сондай-ақ, Шымкент қаласындағыдай тәжік-ауған соғысы ардагерлеріне Тараздағы «Жеңіс» саябағының жанынан ескерткіш ашып берсе деген ұсынысын да жеткізді.

Бүгінгі жиынға арнайы келген Тәкен Молдаханов тарихи туризмді дамытуда қолға алынған іс-шаралардың негізіне тоқталуды сұрады.Өз кезегінде  Асқар Исабекұлы «Ысырап — мәселесіне ел болып көңіл аударуымыз керек. «Бірлік түбі — береке» деген қоғамдық ұйымды құрғалы отырмыз. Үй болған соң әрқайсысымыз той-домалақ өткіземіз. Міне, осы тойда шашылып өткізгенше ысырапшылыдыққа жол бермегеніміз жөн. Одан да артық қаражатымызға мұқтаж жандарға көмектесіп, ел болып жұмылайық. Сондықтан да бірігіп жұмыс жасасақ біраз мәселелерді шешуге болар еді», — деді.«Айғақ-ақпарат».