Соңғы екі жылда екі елдің арасындағы достықтың күшейгендігі аян. Бұл оң өзгеріс білім ордаларының арасында да байқалуда. Биылғы Өзбекстандағы Қазақстан жылына орай М.Әуезов атындағы ОҚМУ-дың филиалы Ташкент қаласынан ашылатын болды. Университеттің стратегиялық даму жоспарында Орталық Азия елдерінде филиалдарды ашу көзделіпті. Бүгінгі таңда университет Өзбекстанның 15 жоғарғы оқу орынымен әріптестік байланыс орнатып, жұмыс жасап келеді. Жаңа оқу жылында Өзбекстаннан 2000-ға жуық талапкер М.Әуезов атындағы ОҚМУ-дың грантын жеңіп, студент атанған. Оның ішінде, әсіресе, қазақ жастарының талпынысы жоғары. Университеттің көрші елден өкілдік ашуына Қазақстан Республикасының Сыртқы Істер Министрлігі айтарлықтай қолдау көрсетуде. Ташкенттегі Қазақстан елшілігінің ғимаратын осы мақсатты орындауға аталмыш оқу ордасына беріпті. Күрделі жөндеу жұмыстары басталып кеткен. М.Әуезов атындағы ОҚМУ-дың қашықтықтан оқыту институтының директоры Еңлікхан Қозыбаевтың айтуынша, биылғы көктем айында өкілдік жұмысын бастайды. Өзбекстандағы жастарға қашықтықтан білім алуға мүмкіндік туып отыр. Сонымен қатар, әлеуметтік аз қамтылған отбасыдан шыққан талапкерлерге қол жетімді біліммен қамтамасыз етуге университет басшылығы тарапынан барлық жағдайлар жасалатын болады.
«Айғақ-ақпарат»
