Сәрсенбіде өңір басшысы Шымкенттегі қалалық медициналық жедел жәрдем көрсету ауруханасында жұмыс сапарымен болды. Облыс басшысы мекеменің жұмысымен танысып, аурухананың «В» корпусында салынып жатқан қосымша жапсарлас құрылыс жұмыстарын бақылады. Бүгінгі таңда аурухана аумағында 3 қабатты жаңа ғимарат салынуда. Нысанның бірінші қабатына әкімшілік пен зертханалық-диагоностикалық және қабылдау бөлімін жайғастыру жоспарланса, екінші және үшінші қабатта жан сақтау мен ота жасау бөлімдері және науқастар бөлмелері орналаспақ. Осы жылдың соңында пайдалануға берілетін жаңа корпусты GMP халықаралық стандартына сәйкес келетін медициналық техникалармен қамтамасыз ету жоспарлануда. Құрылыс жұмыстарының барысымен танысқан аймақ басшысы жауапты сала мамандарына нысанның құрылысын уақытылы аяқтауды тапсырды. Сонымен бірге, жұмыстардың сапалы жүргізілуін жүктеді. Айта кетейік, қалалық медициналық жедел жәрдем көрсету ауруханасында 400-ден астам науқас кепілдендірілген тегін медициналық емдеу көлемін алуда.
Аурухана дәрігерлері 2013 жылдан бері бүйрек және бауыр алмастыру оталарын сәтті жасап келеді. Мұнда соңғы 3 жылда 61 науқасқа бүйрек трансплантациясы жасалса, оның 36 отасын жергілікті дәрігерлер атқарған. Сондай-ақ, 5 науқас бауыр алмастыру операциясын сәтті өткізген.
ОҚО әкімінің баспасөз қызметі
