Жаңалықтар. 15 желтоқсан, 2018 жыл

— Ақ білектің күшімен, ақ найзаның ұшымен ұрпағына аманаттаған бабалардың еркіндік таңының атқанына ширек ғасырдан асты. Ел Тәуелсіздігінің 27 жылында экономикасы дамыған әлемдегі отыз мемлекеттің қатарына ену жолындағы еселі еңбек өз жемісін беріп келеді. Елін сүйген елбасының асқан кемеңгерлігі, әрі көрегендігі. Биыл тарихи оқиғалардың куәсі болған Түркістандықтар мерекені кең көлемде атап өтті. Мемлекеттік және қоғамдық қызметте сіңірген еңбегі, елдің әлеуметтік экономикалық және мәдени дамуына, халықтар арасындағы ынтымақ пен достықтың нығаюына қосқан үлестері үшін 55 адам түрлі марапаттарға ие болды.

—   Ел тәуелсіздігінің 27 жылдығы күні кеше Шымкент қаласында ауқымды түрде аталып өтті.  Түркістан сарайында ұйымдастырылған мерекелік шарада ел дамуына үлес қосқан тұлғалар мемлекет басшысы тарапынан «Парасат» және «Құрмет» ордендерімен марапатталды. Атап айтар болсақ, мерейлі күнде Шымкент қаласы әкімінің орынбасары Қайрат Нұртай «Құрмет» орденін кеудесіне тақты. Ол үшінші мегаполистің  дамуы мен көркеюуіне елеулі үлес қосып жүрген іскер азамат. Қайрат Ырзақұлұлының  мемлекеттік қызметте атқарған жұмыстары мен жетістіктері бүгінде мемлекеттік қызметшілерге үлгі. Еліміздің басты мерекесі қарсаңында табыс етілеген марапаттар тәуелсіздіктің жемісі.

— Түркістан облысының әкімі Жансейіт Түймебаев «Дарын» мемлекеттік жастар сыйлығының иегерлері мен «WoldSkills Kazakhstan-2018» ұлттық чемпионатының жүлдегерлерін қабылдады. Марапатталғандардң қатарында «Дарын» сыйлығының иегері әріптесіміз Салтанат Тойболова да бар. Түркістан облысының мерейін үстем еткен мақтаныштарымыз арнайы алғыс хаттармен марапатталып, алған әсерлерімен бөлісті.

 — Ордабасы ауданына қарасты Темірлан ауылында «Жастар сарайы» ашылды. Енді аталмыш аймақтың жастары бос уақытын тиімді пайдалана отырып, сүйікті істерімен айналыса алады. Салтанатты шараға Түркістан облысының әкімі Жансейіт Түймебаев арнайы қатысып, Тәуелсіздік мерекесі қарсаңында қолданысқа берілген нысандарды да аралады.

— Шағалалы Шардара қаласында «Болашақ»  оқу орталығы ашылды. «Туған жерге туыңды тік» деген мақал дəл бүгінгі іс-шараға айтылғандай. Түркістан облыстық мәслихатының депутаты Бақытжан Серманизовтың қолдауымен ашылған білім ордасы жастардың зердесін ашып, болашаққа бастайтын даңғыл жолдың алғашқы қадамы болмақ.

—  Қойнауы шежіреге толы Отырар ауданының халқы үшін егемендіктің 27 жылдығы ерекше есте қалды. Өйткені, бақытты ғұмырды тарту еткен қос бірдей Кеңес Одағының батырларына ескерткіш қойылып, екінші дүниежүзілік соғыс ардагерлеріне мемориалды кешен ашылды. «Арыс жағалауы» атты саябақтағы бұл нысанға бюджеттен бірде-бір тиын жұмсалмаған.Сондай-ақ Фараби туған мекенде «Оқсыз» спорт кешені ашылып, еңбегі сіңген азаматтар марапат төрінен көрінді.

— Отырар ауданында  вальс королі  Ш.Қалдаяқовтың атынан аллея ашылды. Жалпы құны 43 милл 680 мың теңгені құрайтын саябақ тұрғындардың жайлы қыдырып серуендеуіне ыңғайластырылған. Сонымен қатар айтулы күні аудандық жәрменке ұйымдастырылып 13 ауылдық округтен 55 тонна өнім сатылымға шығарылды.

 – Еліміздегі үшінші мегаполис статусына ие  Шымкент қаласында ағымдағы жылдың қазан айында  әйгілі «World class» брендінің фитнес клубы ашылып өз жұмысын бастады. Бүгінгі таңда қала тұрғындарына салауатты өмір салтын насихаттап 30 дан астам спорт түрлері бойынша жаттығу жасауға мүмкіндік беретін кешеннің жалпы аумағы 4 мың шаршы метрді құрайды. Сонымен бірге барлық талаптарға сай келетін басейні бар фитнес орталығы Тәуелсіздік күні мерекесіне орай суда жүзу спортынан жарыс ұйымдастырып, жеңімпаздарды арнайы сыйлықтармен  марапаттады