— Отырар ауданы тағы бір Алла үйімен толықты. Халықтың игілігі үшін қайырымды істер атқарып жүрген белгілі меценат Өскенбай Үсенов пен оның бауырлары ата-анасының аманатын орындады. Аяулы анасының есімімен пайдалануға берілген Алла үйінде алғашқы намазды Қазақстан Мұсылмандары Діни басқармасының төрағасы, бас мүфти Серікбай қажы Ораз оқыды.
— Елбасы Н.Назарбаев «Ұлт жоспары – 100 нақты қадамының» 80-ші қадамында «Міндетті әлеуметтік медициналық сақтандыруды енгізу» қажеттігін атап өткен болатын. Президент тапсырмасына сәйкес 2017 жылдың 1 шілдесінен бастап қолданысқа енді. Осыған байланысты, жаңа жүйені түсіндіру мақсатында «Әлеуметтік медициналық сақтандыру қоры» коммерциялық емес акционерлік қоғамының Шымкент қаласы және Түркістан облысы бойынша филиалының бөлім басшысы Ахмет Берден келіп, Отырар ауданының тұрғындарымен кездесті. Бұл жүйенің негізгі мақсаты – ел тұрғындарына сапалы медициналық қызмет көрсетумен қатар, денсаулық сақтау саласының әлеуетін арттырып, дәрі-дәрмектерге қолжетімділікті қамтамасыз ету. Бұл туралы толығырақ өз баяндамасында түсіндірген Ахмет Сейсенбайұлы, аудан тұрғындары тарапынан түскен біршама сауалдарға да жауап берді. Сондай-ақ, аталмыш мәжіліске қатысқан Отырар ауданының әкімі Ерлан Айтаханов түсіндіру жұмыстарын жүргізген топ мүшелеріне өз алғысын білдірді.
— Биыл Ордабасы ауданы ауылшарауашылығы өнімдерін еселеп отыр. Пайыздық көрсеткіш өткен жылдың тиісті кезеңімен салыстырғанда арта түскен. Сондай-ақ, жаңадан шаруа қожалықтары мен өндірістік кооперативтер құрылып халықтың тұрмыстық әлеуеті жақсаруда.
— Мемлекет басшысы биылғы Жолдауында еңбек өнімділігін және қайта өңделген ауыл шаруашылығы өнімінің экспортын 2022 жылға қарай 2,5 есеге дейін көбейтуді тапсырды. Ал, нақ осы міндеттерді жүзеге асыруда ауыл шаруашылық саласына қажетті мамандар даярлайтын кәсіптік оқу орындарына да үлкен жауапкершілік жүктелетіндігі белгілі. Осы орайда Бәйдібек ауданындағы №19 колледжі бүгінгі таңда 10 мамандық бойынша 700-ге тарта студентке орта арнаулы кәсіптік білім беріп жатса, бітіруші мамандардың жұмыспен қамтылу көрсеткіші де жыл санап жоғарылап келеді.
— Шымкент қаласындағы «Орталық саябақта» ерекше ескерткіш тұр. Сахналық мінбердің артқы жағында тұрған скрипкашы музыкант көркем өнермен жасалған көненің көзі. Егер, мегаполистің бір көшесіне жайғасса жастар суретке түсіп, алдыңғы буындағы қарттарымыз қызыға қарар дүние-ақ. Бірақ, қоқыс тастайтын жәшікпен бірге қосақтасып тұрған ескерткіштің неге бұл қуыста тұрғаны түсініксіз сұрақ. Дәл осы ескерткіштің қоқыс жәшігімен қатарласып тұрғаны тіпті тағы бір ойды қозғады. Көше бойында тізіліп тұрған қоқыс жәшіктерін осындай бір өнермен әспеттесе, жұрттың назарын аудартып тазалық сақтауға құштарлық одан әрмен оянар еді. Міне, осы секілді қараусыз жатқан дүниелерді көріп іш тартасың. Әрине, бұл туралы мамандардан ой-пікір білу үшін, Шымкент қаласы әкімдігіндегі баспасөз хатшысына хабарластық. Алайда, бұл тарап әзірге жауап қатпады. Алдағы уақытта осы тақырыпқа қайта оралатын боламыз.
— Шымкенттегі Жүсіп Баласағұн атындағы №6 жалпы орта мектебінде алғашқы әскери дайындық пәнінің жетекшілеріне арналған қалалық семинар өтті. Мақсаты -алғашқы әскери дайындық жүйесінде оқушылардың бойында патриотизмді қалыптастыру және оқытушылардың біліктілігін арттыру.
— Айтылған жайдың жаңғырығы. 22 қазан күні арнамыздан Қазығұрт ауданының тұрғыны Бибігүл Құралбаеваның тағдырына қатысты бейнематериал көрсетілген болатын. Онда бір отбасындағы төрт мүгедек жанның әлеуметтік жағдайы төмен екендігі және екі бірдей отбасының 25 шаршы метр тар пәтерде тұрып жатқаны айтылған. 3-ші топтағы Бибігүл Құралбаева сондай ақ, тігін ісімен айналысады. Алайда, тұрмыстық жағдайы төмен болғандықтан бүгінде отбасының жалғыз асыраушысы кәсібімен айналыса алмай отырмын деп шағымданғанды. Мемлекеттен жәрдем болмады деген әлеуеті төмен отбасы, қоғамдағы жаны жомарт жандардан қол ұшын созуды өтінген болатын. Осыған орай, Қазығұрт ауданы әкімдігінің тарапы бейнежазба арқылы жауап берді.
