ОТЫРАРДАҒЫ ОҢДЫ ІСТЕР

Елбасымыз Нұрсұлтан Назарбаев елімізде 2050 жылға дейін шағын және орта бизнестің үлесі 50 процентке жетуі керек деп межелеген болатын. Осы міндетке сай Отырар ауданында шағын және орта бизнес ойдағыдай қарқынды дамып келеді. Кәсіпкерлерге аудан әкімдігі тарапынан да кең қолдау көрсетілуде.

Осы мақсатта Талапты ауыл округіне қарасты шаруаларын дөңгелетіп отырған бірнеше нысандар бар. Солардың бірі — «Сәлімбай» шаруа қожалығы. Бүгінгі таңда талапқа сай салынып жатқан мал бордақылайтын алаң жыл соңына дейін толық аяқталмақ. Аталған жайдың сыйымдылығы 50 бас малды күтіп-баптауға арналған. Айтарлығы, қожалықтың төрағасы Серік Дәуренбековтің әкесі тоқсанның төріндегі Ұлы Отан соғысының ардагері — Сейдахан ақсақал. Шаруа жайын тиімді жүргізіп, істің оңға дөңгелеуіне ардагер қарияның ақылы мен тәжірибесі зор ықпал етуде. Әлі де тың, шаруаға бейім ақсақал ірі қаралардың жем-шөбінің құнарлылығы мен уақтылы тамақтандыру, күтімін қадағалау сынды тынымсыз тірліктерін де өзі қадағалаудан жалықпайды. Біз жолыққанда Елбасының бүгінгі саясатына, ауыл кәсіпкерлеріне қолдау көрсетіп жатқанына дән ризалығын білдірді.

Сондай-ақ, аудандағы «Бек» шаруа қожалығы жылыжай өндірісін қолға алып, халықты көкөніспен қамтамасыз етуде. Бұл шаруашылық негізінен қияр және қызанақ өсірумен айналысады. Алдағы уақытта өз өндірісін ұлғайтпақ ниетте.
«Нұрдаулет -2004» ЖШС-нің басшысы маяқұмдық кәсіпкер Бақтыбай Байымбетов те қыс маусымында аудан тұрғындарының дастарханына қияр, қызанақ жеткізіп халықтың алғысын иеленіп келеді.

«Тер төкпей, еңбектің жемісін жеу мүмкін емес. Әр өнімнің өзіне сай еңбегі жетіп артылады. Қазір қияр мен қызанақ өсірудің қыр-сырына әбден төселдік. Егіс аумағын ұлғайту жоспарымызда бар»,-дейді Б.Байымбетов.
Бауыржан Мырзахметов басқаратын «Серік» шаруа қожалығының 6 гектар қарқынды бауы бар. Дәл осындай көлемде Көксарай ауыл округіндегі «Жұлдыз» шаруа қожалығы алма бағын отырғызған. Шахматтың шаршы алаңы секілді түзу тартылған алма ағашының аралықтарына егілген бақша өнімдері ерекше көз тартады. Алдағы уақытта алма өнімдері де өз тұтынушыларына жол тартпақ.

Сырдарияның қос жағалауы малға жайлы, суы балыққа толы. Балық шаруашылығын өркендетуді көксарайлық кәсіпкер Әбдуахит Есмұрзаев Көксарай көлінде қолға алыпты. Әбдуахит Есмұрзаевтың ата – бабалары да балық аулауды кәсіп еткен екен. Қазіргі таңда «Жұлдыз» шаруа қожалығы балық шаруашылығын дамыту жобасын жүзеге асыру жолында тынбай еңбек етіп жатқаны байқалады. Сондай-ақ, аталған көлде 10 млн куб су сақтауға, су тапшылығын жоюға мүмкіндік бар. Мұнда су мөлшерін реттеп тұратын тоспа салынған. Мұндағы су көксарайлық диқандардың мыңдаған гектар алқапқа егін егуіне жағдай жасайды.
Отырар ауданы ежелден тары дақылы да көптеп өсірілетін аймақ саналады. Ертедегі кәсіпті балтакөлдік диқандар жалғастыруда. Бүгінде «Досжанов.С», «Кәусар» цехтары заман талабына сай тары өңдеуді бастаған. Еліміздің түкпір – түкпіріне тары – талқан өнімдерін жөнелтіп жатқан кәсіпкерлер Сабыржан Досжанов, Сәкен Әбжаппаров цех жұмысын жаңғыртып, жаңа технологиялар арқылы тары өнімдеріне атау беріп, саудаға әр түрлі заманауи қорапшалармен шығарып, өзіндік брендке айналдыруды мақсат тұтып отыр.