ҚР Ауыл шаруашылығы министрі Асылжан Мамытбеков арнайы жұмыс сапарымен Мақтарал ауданында болды. Министр мен өңір басшысы Бейбіт Атамқұлов бастаған жұмыс тобы іс-сапар кезінде аудандағы бірқатар ауыл шаруашылық кәсіпорындарын аралап, жергілікті шаруалармен кездесті. Әсіресе мақта өсіру саласындағы өзекті мәселелер ортаға салынып, мемлекеттік қолдау шараларының биылғы ерекшеліктері жан-жақты түсіндірілді.
Мақтарал ауданына жасаған жұмыс сапары барысында АШ министрі А Мамытбеков алдымен ең алдымен биоагенттер шығарумен айналысатын өңірдегі ірі кәсіңпорын «Биафабрика Жетісай» ЖШС-нде болды. Аталмыш кәсіпорын ауыл шаруашылығы өсімдіктерінің зиянкестеріне қарсы биологиялық препараттар шығарумен айналысады. Мекеменің жылдық қуаттылығы 50 мың гектар егістік алқапқа жететін бракон алтынкөз деп аталатын дәрілік қоспаларды өндіруге бейім. Осы ретте министр егін шаруашылығында әсіресе мақта зиянкестерін жоюға тиімділігі мол өндірістің жұмысымен жан-жақты танысты.
Дәл қазіргі таңда Мырзашөл өңірінде егіс науқаны қызып тұр. Осы бір жауапты кезеңде жергілікті шаруалармен кездесуге келгенАШ министрі мен өңір басшысы Бейбіт Атамқұловтың төрағалық етуімен семинар-кеңес өтті. Қазбек би ауылдық округіне қарасты «Береке Мақта» ӨК-нің егістік алқабында ұйымдастырылған семинарға Ауыл шаруашылық саласымен тікелей байланыста жұмыс жасайтын мекемелердің өкілдері, ғылыми зерттеу институттарының басшылары, ауылдық округ әкімдері, және 200-ге тарта шаруа қожалық төрағалары қатысты. Әсіресе мақта шаруашылығындағы өзекті мәселелер сөз болған жиын барысында Асылжан Мамытбеков соңғы 3 жылда ауыл шаруашылығын мемлекеттік қолдау шаралар 3 есе артқандығын айта келе биылдан бастап сатып алынған АШ техникаларының 25 пайызы мемлекет тарапынан субсидияланатынын жеткізді.
Бұл күні саладағы бірқатар өзекті мәселелер де айтылды. Атап айтқанда топырақтың мелиоративтік жағдайы мен мақта шаруашылығындағы егіс көлемінің ұсақтылғы, ауыспалы егістің сақталмауы мен ск жүйелерінің тозуы. Сонымен қатар ең басты мәселе Мырзашөлдік дихандар үшін бірінші кезекте ағын су тапшылығы болып отыр. Қолда бар мүмкіндікті жүзеге асырып жұмыс жасауға каналдыарды жекешелендіріп алғандар тосқауыл болып отыр деген су комитетінің төрағасынан соң облыс әкімі бұл мәселені өз бақылауында ұстайтынын айтып шұғыл тапсырма берді. Осылайша өткір ойлар мен ұсыныс пікірлер айтылып, өзекті мәселелерді шешуге қатысты тапсырмалар берілген кеңестен соң АШМ Асылжан Мамытбеков аймақтағы « Тәуелсіздіктің 20 жылдығы каналында болып, су арнасының жағдайымен де танысты. Иригациялық жүйенің қуаттылығы секундына 60 текше метр суды құрайды. Бұл ауқымы 86 мың гектар болатын алқапты суландыруға жеткілікті.
Ауыл шаруашылығына бейім Мақтарал ауданында 22 мыңға тарта шаруа қожалығы жұмыс жасайды. Тек биылғы жылдың өзінде аймақ бойынша 83 мың гектардан астам аумаққа мақта дақылы егіледі деп жоспарланып отыр. Сондықтан шаруалардың ала жаздай еткен еңбектері еш кетпеуі үшін алынған өнімнің түсімділігі мен сапасының жоғары болуы қажет. Ал бұл ретте егістікті тиімді суландырудың маңыздылығы айрықша. Алайда ауданда ағын судың тапшылығы бар екендігін ескерсек, суландыру жүйесі шаруалардың бас қатырар басты мәселесі екендігі анық. Сондықтан семинар жұмысына Тараз қаласындағы Қазақ су шаруашылығы ғылыми зерттеу институтының басшылары мен мамандары да қатысып ұсыныс пікірлерін ортаға салды. Осылайша маңызды баяндамалар жасалып шаруаларды толғандырған сауалдарға жауап берілген семинар барысында жергілікті дихандар да өз ойларымен бөлісті. Солардың бірі «Нұралы жол» шаруа қожалығының төрағасы Ербол Ералиев.Талай жылдан бері ауыл шаруашылығымен айналысып келе жатқан қожалық төрағасы егіншілікте мол нәтижеге жету үшін қол еңбек күшін азайтып жаңа технологияларды пайдалану арқылы ғана жақсы нәтижеге жетеміз деп санайды. Семинар-кеңеске жиналған ауыл шаруашылық саласының мамандары бұл күні тың технология бойынша техника көмегімен егістікке мақта шитін отырғызу процесімен де танысып ғалымдардың түсіндірмелеріне ден қойды. Міне осылайша өрбіген семинар кеңестен Мақтаралдық шаруалар біраз маңызды мәселелерді көңілге түйіп қайтты.
Абай Омар
