ЖАҢА ОҚУ ЖЫЛЫНЫ — ЖАҢА МІНДЕТТЕР

      Үшінші мегаполисте ұстаздардың дәстүрлі қалалық Тамыз конференциясы өтті. Биылғы басқосу «Білім келешегі: адал азамат, кәсіби маман» тақырыбында ұйымдастырылды. Жиынға Оқу-ағарту министрі, қала әкімі және білім саласының өкілдері қатысты. Ал, конференцияның басты мақсаты – заман талабына сай, адамгершілік пен кәсіби құзыреттілікке негізделген әлеуметтік жауапты тұлға қалыптастыру жолдарын айқындау.

Аталмыш жиында алғашқы болып сөз алған қалалық Білім басқармасының басшысы педагогтерді жаңа оқу жылының басталуымен құттықтап, шаһардың білім саласындағы негізгі басымдықтарды атап өтті. Оның айтуынша, қазіргі таңда білім сапасын көтеру, мектепке дейінгі тәрбиені дамыту және оқушылардың қауіпсіздігін қамтамасыз ету – басты міндеттердің бірі. Әсіресе, мектепке дейінгі білім беру бағытындағы жетістіктер айрықша атап өтілді.

Бұл басқосуға арнайы келген Оқу-ағарту министрі Ғани Бейсембаев алдағы міндеттерді айқындап берді. Сондай-ақ Мемлекет басшысының білім беру саласына көрсетіп отырған қолдауының нәтижесінде соңғы жылдары жүзеге асқан ауқымды жұмыстарға да тоқталып өтті.
Басқосу білім саласындағы басым бағыттарды саралап, алдағы міндеттерді айқындауға арналды. Қала әкімі Мемлекет басшысы Қасым-Жомарт Кемелұлы Тоқаевтың ұстаздар қауымының қоғамдағы орны мен жауапкершілігін айқын атап көрсет сөзін мысалға алып, оқу-ағарту саласына тек педагогтар ғана емес, қоғам болып атсалысу керектігін айтты.

Конференция барысында білім саласындағы өзекті мәселелер жан-жақты талқыланып, жаңа оқу жылына арналған жоспарлар мен басым бағыттар таныстырылды. Сондай-ақ, ұрпақты тәрбиелеу мен білім беру ісінде ерең еңбегімен көзге түскен ұстаздар мен сала қызметкерлері арнайы марапатқа ие болды. Оларға алғыс айтылып, кәсіби қызметтеріндегі жетістіктері жоғары бағаланды.

Осы жиын аясында білім беру саласындағы жаңа жобалар мен серіктестік ұйымдардың көрмесі ұйымдастырылды. Көрмеге Алматыкітап баспасы да арнайы қатысып, өз жобасын таныстырды. Бұл бастама Қазақстан Республикасының Президенті ұсынған елді цифрландыру саясатын қолдауға бағытталған.
Дәстүрлі тамыз кеңесі — ұстаздардың кәсіби қызметін қолдауға, олардың жетістіктерін атап өтуге және оқушылардың сапалы білім алуын қамтамасыз етуге бағытталған маңызды шара болды.