Шымкент қаласының Жастар сарайында гарнизонның үздік сарбаздарын ұлықтауға арналған салтанатты іс-шара өтті. Мерекелік жиынға Қазақстан Республикасы Қорғаныс министрлігінің әскери бөлімдері мен Ұлттық ұланның қолбасшылығы, сондай-ақ қоғамдық ұйымдардың өкілдері қатысты.
Бұл іс-шараның негізгі мақсаты – сарбаздардың жауынгерлік борышын абыроймен атқаруын дәріптеу, олардың ерен еңбегін көпшілікке үлгі ету және Отан қорғаушылардың отбасыларына алғыс білдіру болды.
Форум аясында сарбаздардың аналарына айрықша құрмет көрсетілді. Өйткені әрбір әскеридің табанды қызметі артында ананың жүрек тәрбиесі, елдік рухы жатыр. Марапаттау рәсімін Шымкент гарнизонының бастығы подполковник Сергей Бибулатов пен «Солдат аналары комитеті – Ана жүрегі» қоғамдық ұйымының өкілі Шарифа Муминова жүргізді.
Сахна төрінде әскерилердің аналары үшін ерекше тосынсый ұйымдастырылды – түрлі әскери бөлімшелерде қызмет етіп жүрген ұлдарымен қауышу сәті әсерлі көрініске айналды. Сарбаздарға алғыс хаттар тапсырылып, 10 күндік демалыс берілді. Көптеген аналар қуаныштан көз жасын тыя алмады.
– Мен 35748 әскери бөлімінде қызмет етемін. Бүгінгі мерекені ұйымдастырғандарға және қолбасшылыққа зор алғысымды білдіремін, – деді қатардағы сарбаз Бақдәулет Есіркеп.
Үздік сарбаздардың бірі, қатардағы Нұрислам Садық та өз әсерімен бөлісті:
– Анамды көргеніме өте қуаныштымын. Бұл – өмірімдегі ең бақытты сәттердің бірі. Қызметімді жоғары бағалаған қолбасшылыққа рақмет.
Әскери қызмет – әрбір азаматтың қасиетті парызы. Сарбаздар Отанды қорғаумен қатар, қоғамда тәртіп пен тұрақтылықты сақтауға, елдің тыныштығын күзетуге үлес қосады. Олар қиын жағдайда әрқашан халықтың қорғаны болуға дайын.
Салтанатты шара 35748 әскери бөлімінің ән-би ансамблі, Ұлттық ұланның 6506 әскери бөлімі және «Яссы» ансамблінің шығармашылық ұжымдары дайындаған концерттік бағдарламаға ұласты. Ән мен жыр, би мен күй сарбаздардың рухын көтеріп, залға жиналғандардың жүрегін елдік мақтаныш сезіміне бөледі.
