Интернеттегі есірткі жарнамасына тосқауыл: Шымкентте 1 200-ден астам ресурс бұғатталды
Есірткі қылмысының тамыр жаюына тек оны тікелей сататындар ғана емес, сонымен бірге желі арқылы насихаттап, тұтынуға итермелейтін ақпарат көздері де үлкен үлес қосуда. Әсіресе әлеуметтік желілер мен мессенджерлерде таралатын жарнамалар мен жасырын хабарландырулар жастарды торына түсіріп, қылмыстық жолға жетелейді.
Мұндай зиянды мазмұнмен күресудің басты тәсілдерінің бірі – оларды уақытылы анықтап, бұғаттау. Осы мақсатта Шымкент қалалық Полиция департаментінің Есірткі қылмысына қарсы іс-қимыл басқармасы күнделікті интернет кеңістігін жіті бақылап, есірткі саудасы мен насихатына қатысты сайттар мен парақшаларды анықтауда.
Жұмысқа тек тәртіп сақшылары ғана емес, арнайы дайындықтан өткен кибер-еріктілер тобы да жұмылдырылған. Олар тәулік бойы мониторинг жүргізіп, күмәнді контентті құқық қорғау органдарына жолдайды.
Осы бірлескен іс-әрекеттердің нәтижесінде биылғы жылдың жеті айында 1 243 заңсыз мазмұндағы интернет-ресурс — сайттар, әлеуметтік желі парақшалары және мессенджер арналары — анықталып, бұғаттау үшін ақпараттық жүйеге енгізілді.
Блоктау үдерісі бірнеше кезеңнен тұрады: алдымен күмәнді ресурс тіркеледі, кейін арнайы мамандар оны сараптап, заңға қайшы екені дәлелденген жағдайда ғана толық бұғаттау туралы шешім қабылдайды.
Құқық қорғау органдары мұндай жұмыстарды жүйелі түрде жалғастыруда. Мақсат — интернетті есірткі жарнамасынан тазарту және жастарды қылмыстық ықпалдан қорғау.
ДРОНМЕН БАҚЫЛАУ: «ТАЗА ҚАЛА» АКЦИЯСЫ АЯСЫНДА ЗАҢСЫЗ ҚОҚЫС ТАСТАУШЫЛАР АНЫҚТАЛДЫ
Шымкентте экологиялық қауіпсіздікті қамтамасыз ету және қаланы таза ұстау мақсатында «Таза қала» акциясы жалғасуда. Бұл шара аясында полицейлер күн сайын абаттандыру ережелерінің сақталуын қадағалап, заңсыз қоқыс тастау фактілерінің алдын алу үшін рейдтер өткізуде.
Рейд барысында дронның көмегімен рұқсат етілмеген жерге қоқыс төккен жүк көліктері анықталды. Әуе құрылғысы түсірген бейнематериалдар құқық бұзушыларды жедел әшкерелеуге мүмкіндік берді.
Тәртіп сақшыларының мәліметінше, дрондар қолжетімсіз аймақтарды бақылауға, экологиялық заңбұзушылықтарды дер кезінде анықтап, олардың алдын алуға үлкен септігін тигізеді.
Анықталған құқық бұзушыларға қатысты әкімшілік хаттамалар толтырылып, қолданыстағы заңнамаға сәйкес жауапкершілікке тартылды.
Полиция қызметкерлері қала тұрғындарын абаттандыру ережелерін қатаң сақтауға шақыра отырып, тазалық пен тәртіп тек бірлескен күшпен қамтамасыз етілетінін еске салды.
ЖОЛ ЕРЕЖЕСІН ӨРЕСКЕЛ БҰЗҒАН ЖҮРГІЗУШІ 10 ТӘУЛІККЕ ҚАМАЛДЫ
Шымкент қаласында жол қозғалысы ережесін және қоғамдық тәртіпті өрескел бұзған 20 жастағы автокөлік жүргізушісі полицейлердің бейнебақылау камералары арқылы анықталды.
Жас жігіт қозғалыс қарқыны жоғары көшелердің бірінде авариялық жағдай туғызып, өзге жүргізушілер мен жаяу жүргіншілердің қауіпсіздігіне қатер төндірген. Оның заңсыз қайта жабдықталған көлігінен қою түтін шығып, жолдағы көріну қашықтығын нашарлатқан және қозғалысқа қатысушыларға елеулі кедергі келтіргені белгілі болды.
Патрульдік полиция қызметкерлері құқық бұзушыны дереу тоқтатып, оған қатысты Қазақстан Республикасының Әкімшілік құқық бұзушылық туралы кодексінің бірнеше бабы бойынша хаттамалар толтырды. Сондай-ақ, ұсақ бұзақылық әрекеті үшін жүргізуші 10 тәулікке әкімшілік қамауға алынды. Оның көлігі айыппұл тұрағына қойылды.
Қалалық полиция басқармасы барлық жүргізушілерді жол қозғалысы ережелерін қатаң сақтауға және қоғамдық тәртіпті бұзбауға шақырады. Қауіпсіздік — әр азаматтың ортақ жауапкершілігі
