Шардара ауданында туризмді дамыту қолға алынып, ауқымды шаруалар атқарылуда. Ал, шағалалы аймаққа қонақтардың келуіне оңтайлы қаладағы ескі әуежайды қалпына келтіру жоспары жүзеге аспақ. Айта кетейік, бұл екі жоба да облыс әкімінің тікелей бақылауында тұр. Сондықтан облыс басшысы Асқар Мырзахметов өткен аптаның соңында Шардара ауданына жасаған іс сапарында әуежай алаңына ат басын бұрды. Тиісті басқарма басшыларына Асқар Исабекұлы әуежайды қайта қалпына келтіру жұмыстарын тез арада бастау үшін тапсырма беріп, қаржы мәселесінің де оңтайлы жолын қарастырды. Көп жылдардан бері тыныштық орнаған ұзындығы 1625 метр, бетондалған ауданының көлемі 75000 шаршы метрді құрайтын аэропорт кешені бойынша бір ай көлемінде жұмысшы топ құрылып, жөндеу жұмыстары басталмақ. Аудан әкімінің орынбасары Тұрсынқұл Байтұрғановтың сөзіне сенсек, бастапқы уақытта Шардара әуежайынан Шымкент бағытына ұшақтар жөнелтілсе, келешекте Алматы мен Астана бағыттарына рейстер қойылмақ. Сонымен қатар, облыс басшысы Шардара су электростансасындағы модернизациялау бойынша құрылыс жұмыстарымен танысып қайтты. Индустриалды ииновациялық картаға енген 75 млн-ды құрайтын бұл жоба 2017 жылдың соңында аяқталмақ. Стансаның қазіргі электр қуаттылығы 100 мгбт болса, келешекте 125 мгбтқа дейін электр қуаты алынбақ екен.
Еңлік ЗАМАНХАН
