Кеше Елбасы жариялаған Бес институционалдық реформасын жүзеге асыруға бағытталған «100 нақты қадам» Ұлт жоспарының орындалуы туралы ОҚО бойынша Мемлекеттік кірістер департаментінің басшысы Алтынсары Үмбетәлиев «Аймақтық» коммуникациялар қызметінде брифинг берді. Департамент басшысы өз баяндамасында саяси құжаттың мемлекет үшін өте маңызды екендігін ерекше атап өтіп, салық және кеден саясатына қатысты мемлекеттік кірістер органдарының құзыретіне жататын 9 қадамды атады.
«Бұл қойылып отырған міндеттердің барлығы да маңызды тапсырмалар. Себебі, индустрияландыру және экономикалық өсім реформасында салық және кеден саясатын тиімді жүргізу ел дамуында ерекше рөл атқарады. Бюджетті толықтырудың басты көзі салықтан түсетін түсім екені белгілі. Қазіргі жағдайда салықтық түсімдерді көбейту мәселесін салық және кеден саясатын оңтайландыру арқылы шешуге болады»,-деді А.Үмбетәлиев. Баяндамашы Ұлт жоспарын жүзеге асыру мақсатында Ұлттық экономика және Қаржы министрліктері, бизнес қауымдастықтарын қатыстыра отырып, Салық және Кеден кодекстерінің орнына, жаңа мемлекеттік кірістер кодексі әзірленіп жатқанын айтты. Сонымен қатар, мүлікті жария ету бойынша мемлекеттік кірістер департаменті мен облыс әкімдігі бірлескен медиа-жоспар құрып, халық арасында кеңінен үгіт-насихат жұмыстарының жүргізіліп жатқанын жеткізді.
Баспасөз мәслихатында департамент басшысы 2017 жылы басталатын жалпыға бірдей декларациялаудың бірінші кезеңінде, депутаттар, мемлекеттік қызметкерлер, судьялар, мемлекеттік кәсіпорындар мен Ұлттық компаниялардың өкілдері енгізілетінін, ал екінші кезеңге, яғни 2020 жылдың соңына дейін халықтың қалған бөлігі қатысатынын мәлімдеді.
«Жалпыға бірдей декларациялардың уақытылы қабылдануын және өңделуін толыққанды қамтамасыз ету мақсатында «Азаматтарға арналған үкімет» мемлекеттік корпорациясы құрылуда. Бұл корпорация, мемлекеттік қызмет көрсете отырып, декларацияларды қабылдау тиімділігін арттырады», -деді департамент басшысы.
Айта кетейік, облысымызда 2014 жылдың 1 қыркүйегінен бастап бүгінгі таңға дейін, жалпы сомасы 48 млрд. 867 млн. теңгені құрайтын 5220 өтініш келіп түсіп, оның 4041 өтініш бойынша, құны 35 млрд 915 млн.теңгені құрайтын мүлік заңдастырылды. Ал сомасы 8 млрд. 894 млн. теңгені құрайтын 726 өтініш құжаттары толық болмауына байланысты кері қайтарылған. Сондай-ақ, 10 азамат құны 6,5 млн. теңге болатын шет мемлекеттердегі мүлкін және 41 азамат 6 млрд. теңге көлеміндегі ақша қаражатын жария еткен.
