Агроөнеркәсіптік кешен саласындағы дайындау ұйымдарының бюджетке төленген, қосылған құн салығы соммасын субсидиялаудың жаңа ережелері 2016 жылы әрекет ете бастайды. Бұл туралы өңірімізге арнайы жұмыс сапарымен келген ауыл шаруашылық вице-министрі Ермек Көшербаев мәлімдеді. Яғни Оңтүстік Қазақстан, Жамбыл, Қызылорда облыстарының салаға жауапты мамандары бас қосқан алқалы жиында Ермек Бедербайұлы жаңа ереже талаптарын жан жақты түсіндірді. Вице-министрдің айтуынша, мемлекеттік қолдаудың мұндай шарасы Мемлекет басшысы мақұлдаған салық заңнамасына түзетулер қабылдануы нәтижесінде мүмкін болып отыр. Ережеге сәйкес агроөнеркәсіптік кешен саласындағы дайындау ұйымдары, яғни ауыл шаруашылық өнімін дайындау, сақтау, тасымалдау және өткізу бойынша қызметті жүзеге асыратын заңды тұлғалар бұрынғыдай қосылған құн салығын жалпы белгіленген тәртіпте есептейтін болады. Сонымен бірге дайындаушы ұйым бюджетке төленген қосымша құн салығы соммасы, осындай ұйымның жылдық жиынтық табысының кем дегенде 90 пайызы ауыл шаруашылық өнімін өткізуден алынған табысты құраған жағдайда, оған субсидия түрінде қайтарылмақ.
Абай Омар
