Созақ ауданы, Жартытөбе ауылы, Аққолтық елді мекенінде 110 жасқа толған Рсымбетов Бейсек Кекіреліұлы есімді қария тұрады. Аудан әкімі Мақсат Исаев ардагер ақсақалды құттықтап, үстіне шапан жауып, қолына жайнамаз ұстатты. Аудан басшысының туған күнімен құттықтағанына ризашылығын білдірген қария. «Айналайын балам, ел өзің туралы жақсы пікір айтады. Көзім нашар көріп, құлағым ауырлағанымен, Тәуелсіз еліміздің өсіп өркендегінін, Елбасының амандығын, туған жерім Созақтың жақсы жаңалықтарын біліп отырамын. Сен қарияны сыйласаң, елің сені сыйласын. Өркенің өссін айналайын» — деп маңдайынан сүйді. «Қариясы бардың қазынасы бар деген. Ұрпақтарыңыздың берекесі болып, көз алдында аман есен жүре беріңіз. Елімізде өзіңіздей сүйегі асыл, қазыналы қарияларымыз көп болсын, жасыңызды ұрпақтарыңызға берсін» — деді аудан әкімі. 
1906 жылы туылған қарияның кіндігінен 2 ұл, 5 қыз, 32 немере, 22 шөбере тараған. Құлағы ауырлау естейтін абыз атаның көкірек көзі сау, көңілі жас. Бүкіл немере шөберелерінің аты – жөнін жатқа біліп, балаларының тату тәттілігін сұрап тұрады дейді бүгінде 75 келген жұбайы Бегманова Жақсықыз. 60 жыл жұбайлық өмір құрған отағасы туралы Жақсықыз апай: «Алмағайып заманда дүниеге келіп, талай зар заманды басынан өткерді. Аштықты да, соғыс уақтысында көрді. Совхоз құрылған 1960 жылдан бастап, аттан түспей түйе бақты. 1990 жылы таяғын інісі Әленге ұстатты. Жас кезінде ауылдың той-томалағында айтысқа түсетін ақындығы болған. Алғашқы әйелі Рсымбетов Талшыбық Таңабайқызына жастай үйленіп, одан ұрпақ сүймеген соң, бәйбішесі рұқсат беріп, 16 жасымда осы аталарыңа тұрмысқа шықтым. Бәйбішесі Талшыбықпен тату тәтті бір шаңырақ астында 18 жыл бірге тұрдық. Ол кісі 1975 жылы қайтыс болды. Әуелі Алланың, сосын шалымның арқасында, бала шағаммен немерелерімнің ортасында бақуатты өмір сүріп отырмын» — дейді Жақсықыз апа.
Немері інісі, ауылдық аурухананың бас дәрігері Мадияр Бейсенбеков: «Өзімізде дәрігерміз. Ұзақ жасауының сыры қазақтың қымыраны мен шұбатында болса керек. Себебі өмір бойы совхоздың түйесін бағып, шөлдесе қымыран мен шұбатты сусын қылған ғой. 84 жасына дейін аттан түспей түйе бақты, зейнетке шыққан соң 5 уақыт намазын беріге дейін оқыды» – дейді.
