Мемлекет басшысының «Ұлт жоспары – қазақстандық арманға бастайтын жол» еңбегінің алғашқы кіріспесі халық мүддесіне қызмет ететін мемлекеттік аппаратты кәсібилендіруден басталып отыр. Осы мәселе жұма күні облыс әкімдігінде де кеңінен талқыға түсті. «Жаңа кәсіби стандарт» атты дөңгелек үстел ұйымдастырылды. Облысымызда бас-аяғы 8217 мемлекеттік қызметкер бар. Олардың халықпен жұмыс істеу барысында этикалық нормаларды сақтауына жауапты қызметкер тағайындалды. Яғни бұл тың саланы «Болашақ» бағдарламасы бойынша АҚШ-та білім алып қайтқан, қадр және мемлекеттік реформалау саласын жетік меңгерген Әсет Байсынов тізгіндеді. Айта кету керек, өңірдің әдеп жөніндегі жаңа уәкілі бұл сәтке дейін облыс әкімі аппараты басшысының орынбасары қызметін атқарып келген. Сонымен қатар, оның атқаратын негізгі қызметіне сыбайлас жемқорлыққа қарсы іс-қимыл туралы заңнама мен әдеп кодексін бұзушылықтың алдын-алуды қамтамасыз ету де жатады.
2016 жылы бастап мемлекеттік қызметшілер де жауапкершілікпен қатар жалақыда да артып отыр. Яғни әрбір халыққа қызмет етушінің айлық табысы бұрынғыдан орта есеппен алғанда 30 пайызға артты. Жаңа Әдеп кодексі туралы баяндама жасаған ҚР Мемлекеттік қызмет істері министрлігінің ОҚО бойынша департаментінің басшысы Берік Бекжанов бұл құжат ең бірінші кезекте қарапайымдылық пен қанағатшылдықты мемлекеттік қызметкерлердің бойында қалыптастыруды көздейді дейді. Мамандығына сәйкес емес, алайда басшылық қызмет атқарып отырған билік басындағылар өз саласына қаншалықты жауапкершілікпен қарауда?! Өз еңбек жолын мысал ете отырып, сөз алған Абай аудандық ардагерлер кеңесінің төрағасы Ұлықпан Бәшенов: «Биікке барып, топ ете қалғаннан, төменнен тәжірибе жинақтау арқылы көтерілгенде мемлекеттік қызметтің қадір-қасиеті болатындығын» ерекше атап өтті.
Ботагөз МӘДІБЕК
