Бүгін Созақ ауданында мәслихат депуттарының кезектен тыс сессия отырысында облыс әкімінің бірінші орынбасары Д.Сатыбалды Созақ ауданы әкімінің лауазымына ОҚО құрылыс басқармасының басшысы Салыхан Полатовты ұсынды. Өз кезегінде аудандық мәслихат депутаттары облыс басшысының ұсынысын қолдады. Осылайша, Созақ аудандық мәслихатының келісімімен облыс әкімі Салыхан Полатовты Созақ ауданының әкімі етіп тағайындау туралы шешім қабылдады.
Салыхан Сабырұлы 1959 жылы Оңтүстік Қазақстан облысында туылған, білімі жоғары, мамандығы бойынша біліктілігі — инженер-металлург, экономист. Еңбек жолын 1982 жылы Манкентживмаш зауытының инженер-технологы болып бастаған. 1983-2005 жылдары Шымкент қорғасын зауытының балқытушысы, аға мастері, «Шымкент қорғасын зауыты» АҚ басқарма бастығының орынбасары, атқарушы директорының коммерция бойынша орынбасары, «Южполиметалл» ЖАҚ директорының орынбасары болып еңбек еткен. 2005-2016 жылдары Оңтүстік Қазақстан облысы жұмылдыру дайындығы, азаматтық қорғаныс, авариялар мен дүлей апаттардың алдын алуды және жоюды ұйымдастыру басқармасы бастығының орынбасары, Шымкент қаласы әкімінің орынбасары, Отырар ауданының әкімі қызметін атқарған. 2016 жылдың ақпан айынан бастап Оңтүстік Қазақстан облысы әкімінің кеңесшісі, ал 2016 жылдың 8 сәуірінен бастап ОҚО Құрылыс басқармасының басшысы болып абыройлы еңбек етті.