Сәні мен салтанаты сәт санап арта түскен Шымкент қаласы тағы да бір мәдени орынмен толықты. Оңтүстіктің тамыры терең тарихын баяндайтын, қазақ елінің ұлттық құндылықтарын паш ететін «Қазына» этно-тарихи кешенінің тұсауы кесілді. Жалпы аумағы 76 гектарды қамтитын ауқымды жобаның ашылу рәсіміне нысанның негізгі авторы болып табылатын, «Нұр Отан» Партиясы төрағасының бірінші орынбасары Асқар Мырзахметов, ҚР Мәдениет және спорт министрі Арыстанбек Мұхамедиұлы, ҚР Парламенті Мәжілісінің депутаты Шалатай Мырзахметов, сондай-ақ, елордадан арнайы келген өзге де қонақтар куә болды. Жалпы Оңтүстік өңірі қазақ елінің ата салтын сақтаған, ұлттық құндылықтарға бай, қаймағы бұзылмаған өлкесі саналады. Ал, «Қазына» этно-тарихи кешені осы аймақтың өткені мен бүгінін, бары мен нәрін паш ететін бірден-бір бірегей мәдени туынды десек те болады.
Тарихи белестер кезеңіне орай тұсау кесу рәсімі жоспарланған нысанның маңыздылығы аса жоғары. Ең алдымен ерекше көзге түсер композиция – Қазақ хандығының 550 жылдығына арналған монумент. Биіктігі 15 метрді құрайтын еңселі ескерткіш елдігіміздің ұйытқысы болған, бүгінгі Алаш жұртының өз тарихын қалыптастырған хандығымызды дәріптейді. Аумағы атшаптырым аймақ Қазақ хандығы монументінен бөлек бірнеше маңызды нысандарды қамтиды. Солардың бірі өңіріміздің рухани және тарихи құндылығын көрсететін сәулеттік ескерткіштердің шағын көшірмелер тізбегі. Ахмет Яссауи, Отырар секілді елге етене таныс жәдігерлерден өзге мұнда Оңтүстіктің 27 киелі орындарының макеті орналастырылған. Сан ғасырлар бойына Батыс пен Шығысты жалғаған Ұлы Жібек жолының бейнесі де «Қазына» кешенінде көрініс тапқан. Ұзындығы 50, биіктігі 8 метрді құрайтын композицияда Оңтүстіктің ежелгі қалалары бейнеленген. Одан өзге ғұламалардың нақыл сөздері жазылған «Даналар өсиеті» де жас ұрпақтың бойына ізгілік сыйлар дүние болмақ. Ұлттық құндылықтарды насихаттайтын Тарихи-өлкетану мұражайы мен Салт-дәстүр орталығы да этносаябақтың аумағына кіреді. Ал, Наурыз алаңы дәстүрлі мерекелерді, мәдени іс-шараларды атап өтуге арналса, «Жайлаукөл» қала тұрғындары мен қонақтарының көңіл көтеруіне арналған демалыс аймағына айналған. «Қазына» этно-тарихи кешені терең мағыналы ой мен еселі еңбектің нәтижесінде ашылып отыр. 2012 жылы құрылысы басталған нысанның бой көтеруіне мұрындық болған, Оңтүстіктің сол кезеңдегі басшысы Асқар Исабекұлы болатын. Алғашқы кезеңді қолға алған «Нұр Отан» партиясы төрағасының бірінші орынбасары Асқар Мырзахметовтың игі бастамасын өңір басшысы Бейбіт Атамқұлов жалғастырмақ. Яғни, алдағы уақытта Оңтүстік халқының ізгілігіне арналған мәдени ошақтардың саны арта түспек.
Әбдімүтәлі ЖҰМАШ
