Шымкенттік тұрғын 36 жасында 10 баланың анасы атанды. Бұған дейін екі жүктілігінде егіз босанған көпбалалы ана бұл жолы үшемді дүниеге әкелді. Осылайша, бір үйдің ғана емес, тұтас әулеттің қуанышы еселенді. Ал сүйінші хабарды естіген ағайын-тума да перзентханаға түгел жиналып, сәбилердің анасын думандатып шығарып алды десек те болады.
17 қыркүйекте батыр ана Ажар Ташқараева екі қыз бен бір ұлды дүниеге әкелді. Үш сәбиге Альсия, Сафия және Аймұхаммед есімдері берілді. Бұған дейін бес мәрте құрсақ көтерген Ажар жеті перзенттің анасы еді. Үшемнің дүниеге келуімен 36 жастағы ананың бала саны онға жетті.
Алты ұл мен төрт қыздың анасы атанған Ажар 10 қыркүйекте қалалық перинаталдық орталыққа түскен. Арада бір апта өткенде, яғни 17 қыркүйекте, үшемді кесарь тілігі арқылы дүниеге әкелді. Ота жасауға орталықта 2011 жылдан бері еңбек етіп келе жатқан акушер-гинеколог Дәулет Яминұлы қатысқан. Қыздардың бірі 1 келі 700 грамм, екіншісі 1 келі 400 грамм салмақпен туса, ұлдың салмағы 1 келі 700 грамм болған. Сондай-ақ күрделі операцияға жоғары және орта санатты 15-ке жуық медицина маманы қатысқан.
