ПОШТА САЛАСЫНЫҢ ӨТКЕНІ МЕН БҮГІНІ

Бұрын алыстағы ағайыннан келген хатты пошташыдан асыға күтетін едік. Бүгінде хаттың орнын хабарлама басқанымен, пошта қызметінің маңызы жойылған жоқ. Керісінше, сәлемдеме жеткізу мен электронды сауда дамыған заманда бұл саланың міндеті арта түсті. Қаладағы Энергетика және байланыс колледжінде дүниежүзілік пошта қызметкерлерінің кәсіби мерекесіне орай арнайы іс-шара өтті.

Колледжде пошта мамандарын даярлау ісі өткен ғасырдың екінші жартысында басталған. Содан бері бұл мамандықтың маңызы кеміген емес. Оқу орнының басшылығы пошта қызметін әлем бойынша сұранысқа ие салалардың бірі деп есептейді. Өйткені технология дамығанымен, халыққа қызмет көрсететін білікті мамандарға қажеттілік сақталып отыр.

Іс-шараға салада ұзақ жыл еңбек еткен ардагер ұстаздар да қатысты. Олар өз тәжірибелерімен бөлісіп, пошта қызметінің жауапкершілігі мен қоғамдағы орнын атап өтті. Айтуларынша, бұл мамандық тек хат пен сәлемдеме жеткізумен шектелмейді. Ең бастысы – халық сенімін ақтап, сапалы қызмет көрсету. Болашақ мамандар білімін тәжірибемен ұштастыруға мүмкіндік алған. Студенттер Қазпошта бөлімшелерінде тәжірибеден өтіп, қызмет көрсету тәртібін меңгереді. Бұл оларға мамандықтың қыр-сырын үйреніп, еңбек нарығына бейімделуге көмектеседі.

Колледжде өткен кездесу пошта саласының өткенін ұлықтап, бүгінгі жетістігін көрсетуге мүмкіндік берді. Ал жас мамандар үшін бұл – тәжірибе жинап, болашаққа бағдар алатын маңызды қадам. Өйткені ел арасын жалғаған пошта қызметі уақытпен бірге жаңарып, халыққа қызмет етуін жалғастыра бермек.