Шымкентте өткен жылы құрылысы басталған Қазиев көшесінің жалғасы пайдалануға берілді. Төрт жолақты жаңа жол қаланың солтүстік бөлігіндегі көлік қозғалысын жеңілдетіп, Бәйдібек би даңғылына түсетін жүктемені азайтуға септігін тигізеді. Заман көшіне ілескен шаһарда тағы бір тың бастама қолға алынды.
Шымкенттің түйткілдерін технология арқылы шешуге ниетті жастар бас қосып, «Smart City Hackathon 2026» байқауында бақ сынасты. Басты мақсат – қаланың өзекті мәселелеріне цифрлық шешім тауып, тұрғындарға қолайлы әрі қауіпсіз орта қалыптастыру. «Smart City Hackathon 2026» байқауына 60-тан астам өтінім түсіп, ішінен үздік 20 команда іріктелді. Қатысушылар жеті күн бойы көлік, қауіпсіздік, экология және қалалық сервистер саласындағы өзекті мәселелерге арналған цифрлық жобаларын ұсынды.
Аталған жарыста ақтөбелік үш жігіттен құралған стартап командасы коммуналдық төлемдерді жеңілдетуге бағытталған цифрлық жүйені таныстырды. Платформа WhatsApp арқылы жіберілген есептегіштің суретін жасанды интеллект көмегімен танып, оның кемге тиесілі екенін анықтайды және қажетті ақпаратты бірден шығарып береді. Сонымен қатар бұл жүйе есептегіш көрсеткіштерін бақылауда ұстайды: бұрынғы және қазіргі көрсеткіштерді салыстырып, тұтыну көлемінің артқанын немесе азайғанын көрсетіп отырады.
