Жаңаталапта кішкентай тұрғындардың қуанышына тағы бір себеп бар! Шағын ауданда жаңа балалар ойын алаңшасы пайдалануға берілді. Бұл — биыл осы ықшамаудан бойынша жоспарланған 5 алаңның алғашқысы. Ал қалған 4 нысан тамыз айының соңына дейін ел игілігіне беріледі.
Тұран ауданына қарасты Жаңаталап тұрғын алабында халықтың сұранысы бойынша балаларға арналған заманауи ойын алаңы жасақталды. Мұнда бүлдіршіндердің көңілді уақыт өткізуіне қажетті ойын құрылғыларымен қатар, спортпен шұғылдануға арналған кешенді алаңша да қарастырылған. Сонымен қатар жаңа нысанның ашылу салтанатында балаларға арнайы ойыншықтар мен балмұздақ таратылды.
Елді мекен тұрғындары ойын алаңшасының балалар игілігіне берілгеніне дән риза. Биыл Тұран ауданында 28 балалар алаңшасын пайдалануға беру жоспарланған. Жобалардың жалпы құны 870 миллион теңгені құрайды. Әр ойын алаңының аумағы орта есеппен 700–800 шаршы метрді қамтиды, ал бір алаңның орташа құны — шамамен 25 миллион теңге. Жаңа нысандардың сапасына 3 жылдық кепілдік мерзімі қарастырылған.
