Шымкентте өткен ғасырдың 60–80 жылдарынан бері кәдеге жарап келген, көненің көзіне айналған әуе желілері жаңартылды. Жарты ғасырдан астам уақыт қаланың электр жүгін көтерген бұл желілердің тозығы жетіп, соңғы бес жылда 24 рет технологиялық өшіру тіркелген еді. Енді ескі желілер жаңарып, электрмен сенімді түрде қамтамасыз ету деңгейі арта түсті. Нәтижесінде қаладағы 15 шағын ауданда тұратын 24 мыңнан астам тұтынушы тұрақты электр қуатына қосылды.
Энергетикалық және коммуналдық секторларды жаңғырту мақсатында жалпы құны 2,4 миллиард теңгені құрайтын екі пилоттық жоба 2025 жылы басталып, ағымдағы жылы толық іске асырылды. Бұл – республика бойынша Ұлттық жоба аясында жүзеге аскан алғашқы нысандар.
Атап айтсақ, қаладағы тозығы жеткен, кернеуі 35 кВ болатын «Қайтпас» және «21-партсъезд» екі әуе электр желісі жаңғыртылды. Маманның айтуынша, бұған дейін желінің бірін жөндеу үшін ажыратқан кезде жүктемені екінші желіге ауыстыру мүмкін болмаған. Қазір бұл түйткіл шешілді. Екі желі де бір-біріне қосалқы қуат көзі ретінде қызмет ете алады. Сонымен қатар жаңғыртудың нәтижесінде желілердің тозу деңгейі 81 пайыздан 20 пайызға дейін төмендеді.
