Жолдың жыры, тарифтің салмағы, автобустың азабы. Әл-Фараби ауданындағы халықпен кездесуде шымкенттіктер көкейдегі көп мәселені әкімнің алдына жайып салды. Шымкент қаласының әкімі Ғабит Сыздықбековтың кезекті есептік кездесуі бұл жолы Әл-Фараби ауданында өтті. Әдеттегідей ресми баяндамадан гөрі тұрғындардың талап-тілегі басым түскен жиында халық күнделікті өмірге әсер ететін ең өзекті мәселелерді ашық айтты.
Сөздің басын әкім мырза сіз әлі бізге 5 жылдай керексіз деп бастаған қарт ана қалалық транспорт басқармасының басшыысын сынға алды. Берген уәдеде тұрмайтын басшының ісі көңілден шықпайтынын кесіп айтты. Әсіресе коммуналдық қызмет бағасының өсуі көпшілікті алаңдатып отырғаны байқалды. Халық тарифтердің әр теңгесі нақты нәтижемен өлшенуі тиіс екенін айтып, сапалы қызмет талап етті. Кездесу барысында шаһар басшысы көтерілген әр мәселені назарға алып, жауапты басқарма жетекшілеріне нақты тапсырмалар жүктеді. Тұрғындардың ұсыныстары мен шағымдары хаттамаға енгізіліп, орындалуы бақылауға алынатыны айтылды. Әл-фараби ауданындағы бұл кездесу тағы бір шындықты көрсетті: тұрғындарға құр уәде емес, көзге көрінетін нәтиже керек. Ал тұрғындардың талап-тілегінің орындалуы әкімнің басты назарында болмақ.
