КІТАП ОҚИТЫН ҮЗДІКТЕР АНЫҚТАЛДЫ

Бірегей жоба.  15 кітап оқып 1 млн теңге қанжығаға байланды. Шымкентте 2025 жылы басталған «Кітап оқитын ұлт» жобасы аз уақытта ауқымды нәтижеге қол жеткізді. 8 ай ішінде 66 мыңнан астам тұрғын қатысып, жарты миллионнан аса кітап оқылған. Марапаттау рәсімде үздіктер анықталды. Бұл бастама жастардың білімге деген қызығушылығын арттырып, рухани мәдениетті жаңа деңгейге көтеруге жол ашады.

    Шымкентте бастау алған «Кітап оқитын ұлт» пилоттық жобасы тұрғындардың қызығушылығын тудырды. Жобаға 26 мыңнан астам оқушы мен 18 мыңнан аса студент белсенді қатысты. Сонымен қатар мыңдаған педагог пен отбасылар бұл бастаманы қолдаған. Бүгінде қатысушылардың әрқайсысы орта есеппен 15 кітаптан оқып, нәтижеге жеткен. Бұл – қала тұрғындарының білімге деген сұранысы жоғары екенін дәлелдейді. Жоба аясында «Кітап оқитын мектептен» бастап, «Кітап оқитын мемлекеттік қызметшіге» дейінгі 6 бағыт қамтылған. Әр бағыт қоғамның түрлі саласын біріктіріп, кітап оқу мәдениетін кеңінен насихаттауға жол ашты. Іріктеу кезеңі наурызда басталып, сәуір айында өз мәресіне жетті. Нәтижесінде үздік қатысушылар анықталып, сән салтанатпен марапатталды.

Бүгінде бұл жобаның нәтижесіне қуанып жүрген жастардың қатары артып келеді. Қаладағы №49 жалпы орта  білім беретін мектептің 8-сынып оқушыларыда  үздіктер қатарынан көрінді. Сайысқа қатысқан оқушылар кітапты жастайынан серік етіп, оқу арқылы биік жетістікке жетуге болатынын айтады. Мемлекет басшысы Қасым-Жомарт Тоқаев кітап оқудың маңызын ерекше атап өткен болатын. Осы бастама соның нақты іске асқан үлгісіне айналып отыр. Жоба жастардың таным көкжиегін кеңейтіп, отбасылық құндылықтарды нығайтуға ықпал етуде. Қалада кітап оқу жаңа трендке айналып, зияткерлік орта қалыптасып келеді. Алдағы уақытта бұл жоба тұрақты түрде жалғасады.