ШАХМАТТАН ҮЗДІКТЕРІ АНЫҚТАЛДЫ

Үшінші мегаполисте Senat Open 2026 ашық кубогының қалалық кезеңі өтті. Дәстүрлі сипат алған спорт сайысы осымен үшінші рет ұйымдастырылып отыр. Депутаттардан бастап бұқаралық ақпарат құралдарының өкілдеріне дейін қатысқан шахмат турнирінде 100-ден астам қатысушы бақ сынады.
Senat Open 2026 ашық кубогының 1/4 финалының ашылу салтанаты жоғары деңгейде ұйымдастырылды. Ой ұшқырлығы сынға түскен додаға мәслихат депутаттары, мемлекеттік қызметкерлер, қоғамдық кеңес мүшелері, білім, денсаулық сақтау және мәдениет саласының мамандары, сондай-ақ құқық қорғау және күштік құрылым қызметкерлері мен БАҚ өкілдері қатысты. Әртүрлі сала мамандары бас қосқан шахмат бәсекесінде қатысушылар өзара сынға түсіп, мықтыларды анықтады.
Шахмат турнирі швейцариялық жүйе бойынша ұйымдастырылып, қатысушылар бірнеше турда өзара бақ сынасты. Нәтижесінде жеңімпаздар мен жүлдегерлер анықталып, арнайы дипломдар және алғыс хаттармен марапатталды. Бүгінгі өткен турнир қорытындысы бойынша 35 мықты ойыншы жарыстың келесі кезеңіне жолдама алды. Енді олар Тараз қаласында өтетін жартылай финалда Шымкенттің намысын қорғайды. Ал турнирдің финалдық кезеңі Астана қаласында өтетін болады.