Әр балаға 43 500 теңгеден беріледі. Жаңа оқу жылының қарсаңында “Мектепке жол” қайырымдылық акциясы басталып кетті. Мегаполистегі 56 183 бала аталған акцияға қатысады. Оған қазынадан 2 млрд 400 млн теңге бөлініп отыр. Бұл көмекті кімдер алады, сондай-ақ, барлық мектепте қаралған ба? Аталған тақырып аясында мегаполистің бас ұстазы Нұргүл Шәмшиева мәлімдеді.
Еліміздің барлық аймағында аталған акция басталды. Жыл сайын тамыздың 1-і мен 30-ы аралығында өтетін қайырымдылық шарасы Үкіметтің №64-ші Қаулысы негізінде жүзеге асырылады. Шаһарда жалпы саны 275 білім ұясы болса, оның 150-і мемлекеттік оқу ошақтары. Осы ретте көмектің тек мемлекеттік мектептерде қаралғанын айтып өткен жөн. Бұл көмек мынадай санаттағы отбасының балаларына беріледі: 1) мемлекеттік атаулы әлеуметтік көмек алуға құқығы бар отбасылардан шыққан балаларға – 11 390 2) мемлекеттік атаулы әлеуметтік көмек алмайтын, жан басына шаққандағы табысы ең төмен күнкөріс деңгейінің шамасынан төмен отбасылардан шыққан балаларға – 39 841 3) отбасыларда тұратын жетім балаларға және ата-анасының қамқорлығынсыз қалған балаларға – 399 4) төтенше жағдайлардың салдарынан шұғыл жәрдемді талап ететін отбасылардан шыққан балаларға – 0 5) білім беру ұйымының алқалы басқару органы айқындайтын білім алушылар мен тәрбиеленушілердің өзге де санаттарына (бұдан әрі – білім алушылар мен тәрбиеленушілер) – 4 553 Қаржылай және материалдық көмек көрсетуге бөлінетін қаражатты қалыптастыру, жұмсау бағыты мен есепке алу тәртібін айқындайды. Қамқоршылық кеңес білім беру ұйымының алқалы басқару органы болып табылады. 43 500 теңгені ата-аналар баласына қажетті оқу құралы мен киіміне жұмсайды. Сондай-ақ, алған затының түбіртегін көрсетуі керек. Білім нысандарындағы инфрақұрылымды жақсарту бойынша мегаполисте 2024 жылы 12 “Жайлы мектеп” бой көтереді. Ал бірінші сыныпқа 26 979 баланы қабылдау жоспарланып отыр.
