Қала күні мерекесі қарсаңында Шымкент шаһары тағы бір жаңа нысанмен толықты. Яғни бұл күні заманауи үлгіде бой көтерген 320 орындық «Хадиша» балабақшасы салтанатты түрде пайдалануға беріліп, оқушылар мен ата-аналар қауымын шаттыққа кенелтті. Айта кету керек, бөбекжай құрылысын «Жедел құрылыс» ЖШС-гі өткен жылдың шілде айында бастап кестеге сәйкес өз мерзімінде толықтай аяқтап шыққан. Осы орайда жаңа мекеменің ашылу салтанатына қала әкімі Ғабидолла Әбдірахымов арнайы келіп, бүлдіршіндердің қуанышына ортақтасты.
Соңғы жылдары елімізде мектеп жасына дейінгі балғындарды балабақшамен қамту мәселесіне басымдық беріліп келеді. Бұл ретте жыл санап халық саны артып келе жатқан Шымкент қаласында да балалар бақшасына деген сұраныс жоғары. Сондықтан кезекте тұрған бүлдіршіндерді 100 пайыз балабақшамен қамту жолында жүйелі жұмыстар атқарылып отыр. Мәселен жыл басынан бері Шымшаһарда екі бірдей мектепке дейінгі мекеме пайдалануға берілсе, қала күні мерекесі қарсаңында есігін айқара ашып отырған №57 «Хадиша» балабақшасы балаларды қуанышқа бөлеген үшінші нысан. Ал өз кезегінде кішкентай бүлдіршіндер қала күні мерекесімен тұспа-тұс келген жаңа ғимараттың ашылу салтанатында жиналған қонақтарға арнап концерттік бағдарламаларын ұсынды. Яғни ән айтып, би билеген балғындардың өнері жиналған жұртшылыққа көтеріңкі көңіл күй силады. Сондай ақ шара барысында зәулім ғимарат құрылысын жүргізіп, балабақшаны өз мерзімінде сапалы етіп пайдалануға ұсынған «Жедел құрылыс» ЖШС-нің құрылтайшысы Талғат Бейсенов жаңа мекеме кілтін салтанатты түрде табыс етті.
Осылайша бұл күні кішкентай балғындар мен ата-аналарды қуанышқа бөлеген ғимараттың салтанатты түрде ленасы қиылып, қала әкімі бастаған бір топ қонақтар заман талабына сай жабдықталған балабақша ішін аралап көрді. 16 топқа негізделген мекеме барлық қажеттіліктермен қамтылған. Мұнда балаларға арналған ойын бөлмесі, асхана, бүлдіршіндердің ән шырқап, би билеуіне арналған музыка залы және әр топқа арналған ойын алаңшалары да бар. Сондай-ақ салауатты өмір салтын қалыптастыруға арналған спорт залдары мен медбике бөлмесі, психолог, логопед және ұстаздар бөлмелері де бар. Ал әрбір бөлме сол топ балаларының жас ерекшелігіне қарай дайындалған. Ендігі жерде жаңа балабақша ұжымы мектеп жасына дейінгі 300-ден астам бүлдіршінге сапалы тәлім-тәрбие беру жолында аянбай тер төге бермек.
Абай Омар
