Сақ болыңыз! Конго қырым қанды қызбасы, яғни кенелердің қаптайтын кезеңі басталды. Шымкентте жыл басынан бері кене шағу дерегімен медициналық көмекке 24 адам жүгініпті. Бұл көрсеткіш өткен жылмен салыстырғанда 3 есеге төмен. Дегенмен, мамандар сәуір, мамыр айларында сақ болуға шақырады!
Шымкент қаласының аумағында Конго-Қырым геморрагиялық қызбасының табиғи ошақтары орналасқан. Аурудың алдын алу үшін мамандар арнайы жиын өткізді. Олардың айтуынша кенелердің табиғатқа жаппай шығуы әдетте наурыз-сәуір айларының басында басталады, олардың шығуынан зардап шеккендердің ең көп саны мамыр-маусым айларында тіркеледі.
Конго-Қырым қанды қызбасы — аурудың адамға жұғуы кене шаққанда, қанға тойған кенелердің қаны адамның шырышты қабығына немесе терісіне тиген кезде, науқастың заттары мен бұйымдарымен байланыста болған кезде, малдағы кенелерді тазалаған кезде, қайшымен қырқу және кенелерді қолмен алып тастау кезінде болады.
Егер кене шақса адамда температураның 39-40 градусқа дейін тез көтерілуі, қатты бас ауруы, көздің, беттің, мойынның және дененің жоғарғы бөлігінің қызаруы, мойын мен арқа бұлшықеттерінің ауыруы, жүрек айну, құсу, іш өту, сосын терінің бөртуі, мұрын, қызыл иек, жатырдан және асқазаннан қан кетуі белгілері байқалады.
Конго-Қырым геморрагиялық қызбасының алдын алу үшін кене шаққан жағдайда немесе кенемен жанасқанда, бірден медициналық көмекке жүгіну қажет. Кене жабысқан жағдайда оны жоймай, беті тығыз жабылатын ыдысқа салып, зертханаға зерттеуге тапсыру қажет. Ал кене шағуынан зардап шеккен адамдар жергілікті емдеу профилактикалық мекемемен 14 күн медициналық бақылауға алынады.
Айта кетейік, Түркістан облысы бойынша дезинфекция орталығы тарапынан кенеге қарсы көктемгі залалсыздандыру жұмыстары сәуір айының 15 мен 17 аралығында жүргізілу жоспарланған. Сондай-ақ, оның екінші кезеңі тамыз айында жүргізіледі.
