Шымкент қаласы тағы бір серпінді кәсіпорынмен толықты. Яғни «Тассай» индустриалды аймағында Қазақстандағы ерекше жобалардың бірі болып табылатын «Мега Смарт» зауыты өз жұмысын бастады. Жиһаз өнімдеріне қажетті жылтыр түрлі-түсті тақталар мен жылына 5 мың дана жиһаз түрлерін құрастырумен айналысатын бұл жоба 69 азаматты тұрақты жұмыспен қамтып отыр. Заманауи технологиялармен жабдықталып өз өнімдерін бірқатар көршілес мемлекеттерге де шығаруды жоспарлап отырған кәсіпорынға арнайы келген облыс әкімі зауыттың лентасын қиып ұжымның алдағы жұмысына сәттілік тіледі.
«Тассай» индустриалды аймағында жүзеге асырылған серпінді жобалардың бірі «Мега Смарт» зауытының жалпы жобалық құны 545 млн тенгені құрайды. Өңіріміздегі тіпті еліміз бойынша бірегей мүмкіндіктерге ие өндіріс орнына арнайы келген аймақ басшысы Жансейіт Түймебаев бұл жобаның маңыздылығына тоқталды.
«Аумағы 89 га құрайтын «Тассай» индустриалды аймағында 24 инвестициялық жоба қолға алынуда. Солардың бірі – «Мега Смарт» ЖШС-ның МДФ жылтыр плитасын және жиһаз шығаратын зауыты. Осы жоба бойынша облысқа 545 млн.теңге инвестиция тартылып, 69 адам тұрақты жұмыспен қамтылды» – деді Жансейіт Қансейітұлы.
Айта кету керек бұл кешендегі алғашқы цехта жиһаз өнімдерін жасауға қолданылатын жылтыр тақталар дайындалады. Яғни заманауи үлгідегі Оңтүстік Корея елінің технологияларымен жабдықталған өндіріс орнының бұл бөлігінде жиһаз тақтайшалары әсем жапсырмалармен қапталса, кәсіпорынға қажетті шикізат толықтай Мақтаарал ауданынан жеткізіледі.
Сонымен бірге зауытта жылына 5 мыңға тарта жиһаз түрлерін құрастырумен айналысатын цех жұмыс жасайды. Кішкентай бүлдіршіндерге арналған үстел орындықтарынан бастап, асхана жиһаздары, мектеп парталары мен кеңсеге арналған сапалы жиһаз өнімдерінің түр- түрі осы жерде дайындалады. Ал бұл жұмыстар бойынша кәсіпорында қазіргі таңда жалпы саны 69 адам еңбек етуде. Алдағы уақытта зауыттан шығарылып жатқан өнімдер жергілікті нарықтан өзге Өзбекстан, Қырғызстан, Тәжікстан және Ресей елдеріне де экспортталатын болады.
Заманауи мүмкіндіктерге ие зауыт өнімдерінің сапасын жоғары бағалаған аймақ басшысы жергілікті кәсіпорын жиһаздарын отандық нарыққа да кеңінен таныстыру қажеттігін тапсырды. Айта кету керек бұл бағытта жаңа өндірістің қазіргі таңда Алматы Қызылорда, Қостанай және Павлодар қалаларында арнайы өкілдіктері жұмыс жасаса, алдағы уақытта өкілдіктерді еліміздің барлық облыстарынан ашу жоспарланып отыр екен.