СУ АЙДЫНДАРЫНАН БАКТЕРИОЛОГИЯЛЫҚ ЗЕРТТЕУЛЕРГЕ СЫНАМА АЛЫНДЫ

Маусымдық шомылу кезеңінің басталуына байланысты, Шымкенттегі су айдындарынан бактериологиялық зерттеулер жүргізу үшін 13 сынама алынған. Бұл туралы, Санитарлық-Эпидемиологиялық Департамент басшысының орынбасары мәлімдеді. Сөзінше, одан бөлек санитариялық-химиялық зерттеулер үшін 9 сынама, ал тырысқақ ауруына қатысты 84 су сынамасы алынып, тексеруге жолданған. Жауапты маманның айтуынша, сынама алынған орындардың барлығы санитариялық нормаларға сай келеді.

Жауапты Департамент басшысының айтуынша,шомылу орындарының тазалығына қатысты бірнеше талаптар бар. Мәселен,бассейндерде ерлер мен әйелдерге арналған шешіну-киіну орындары, себезгі бөлмелері, санитариялық тораптар, ваннасы бар зал, персоналға арналған тұрмыстық үй-жайлар, спорт мүкәммалын сақтауға арналған қоймалар, жинау мүкәммалын жуу және дезинфекциялау құралдарын сақтауға арналған қоймалар, әкімшілік үй-жайлар, медициналық персоналға арналған кабинет болуы тиіс. Сондай-ақ, бассейннің жүретін жолдары, бассейннің түбі су өтпейтін материалдардан және ылғалға, тазалауға қолданылатын химиялық реагенттер мен дезинфекциялау құралдарының әсеріне төзімді болуы қажет.