«БИЗНЕСКЕ ЖОЛ» ЖОБАСЫ АЯСЫНДА 700 КӘСІПКЕРДІҢ ҚҰҚЫҒЫ ҚОРҒАЛДЫ

Шымкент қаласында кәсіпкерлердің құқықтары мен заңды мүдделерін қорғау мақсатында “Бизнеске жол”жобасы басталған болатын. Бұл сыбайлас жемқорлық тәуекелдерінің өңірлік картасына енгізілсе, жыл басынан бері 700-ден астам бизнес субъектілерінің құқықтары қорғалды. Осы ретте департамент өкілдері кәсіпкерлердің мәселелерін шешу бағытындағы жүйелі жұмыстардың нәтижелерінен хабардар етті.

Аталмыш жобаның негізгі міндеті – бизнес ортадағы әкімшілік кедергілерді жою, мемлекеттік органдардың өзара іс-қимыл жасау арқылы кәсіпкерлерге көмек көрсету. Қазіргі таңда бизнесті қорғау бойынша жұмыс 3 бағытта жүргізілуде. Кәсіпкерлер көбіне жер қатынастары, салықтық және кәсіпкерлік бастамаларды мемлекеттік қолдау саласындағы кедергілерге шағымданады екен. ҚР Сыбайлас жемқорлыққа қарсы іс-қимыл Агенттігінің Шымкент қаласы бойынша департаменті басшысының бірінші орынбасары Жандос Жұмабаев бизнесте кездесетін сыбайлас жемқорлық тәуекелдері мен әкімшілік кедергілерді жою бойынша жұмыс жалғасып жатқанын мәлімдеді.

Жоба қалалық кәсіпкерлік палатасымен де бірлесе жүзеге асырылуда. Шымкент қаласы Кәсіпкерлер палатасының директоры Сәбира Адамбекова биыл жыл басынан бері тұрғындардан 150-ге жуық өтініш түскенін атап өтті. Олар — негізінен, мемлекеттік сатып алу туралы шарттар бойынша төленген борыштар сомалары, негізсіз әкімшілік айыппұлдар және тағы басқа шағымдар.

Өткен жылы қалалық кәсіпкерлер палатасының қарауына 200-ге жуық өтініштер түскен. Оның ішінде 63,8%-ы оң шешімін тауып, 85 127 633 теңге сомасында азаматтардың құқықтары қорғалды.