Халықтың тұрмысын түзеу, табысын арттыру мақсатында елімізде түрлі әлеуметтік бағдарламар мен жобалар жүзеге асуда. Кез келген елдің экономикалық дамуында шағын және орта кәсіпкерліктің алатын орны ерекше. Сондықтан кәсіпкерлікті қолдау елімізде айрықша басымдық берілген салалардың бірі. Осының негізінде Ел Президенті нәтижелі жұмыспен қамту және жаппай кәсіпкерлікті дамыту бағдарламасы аясында әр өңірде Кәсіпкерлер палатасы арқылы «Бастау бизнес» жобасы жүзеге асыру қажеттігін атап өткен. Мамандарының сөзінше, қарапайым тұрғындар, әсіресе, шалғай ауданда тұратындар үшін игі бастаманың тиімділігі өте мол. Өйткені бұл жобаға тек жұмыссыздар мен өзін-өзі жұмыспен қамтушылар ғана қатыса алады. Жеке кәсібін ашуға ниеттенгендерге көрсетілетін қолдау соңғы жылдары көптеген ажұмыссыз азаматтардың тірлігін тіктеуге сеп болған. Сондай-ақ жобаның тағы бір тиімді тұстары – мұндағы бір айлық оқуға қатысқандарға шәкіртақы да қарастырылған. Кәсібін ашуға ниеттенгендерге білікті бизнес-тренерлер дәріс беріп, кәсіпкерліктің қыр-сырына үйретеді. Жобаның шарапатын көріп ісін өрге дөңгелетіп отырған үшінші мегаполистің грант иегерлері өнімдерін көрме-жәрмеңкесінде ұсынды. Іс-шараға қала әкімі Мұрат Әйтенов қатысып, 150-ге жуық шағын және орта бизнес өкілдерінің жобаларымен танысты.
«Тауарларды жасауға кәсіпкерлердің бар өнерін, ынта-ықыласын салғаны көрініп тұр. Мемлекет ұсынған гранттарды конкурс арқылы жеңіп алған қала тұрғындары өз бизнесін бастап, сапалы әрі нарықта сұранысқа ие тауарларды өндіріп жатыр. Бұл бір жағынан шымкентіктердің кәсіпке бейім әрі еңбекқор екенін көрсетсе, екінші жағынан мемлекеттің шағын және орта бизнеске көрсетіп жатқан қолдауының нақты нәтижесі» — деді қала әкімі.
Жәрмеңкеде кондитерлік өнімдер, жиһаз өндіру, қызмет көрсету салалары бойынша түрлі әлеуметтік жобалар қойылды. Сондай-ақ арнайы ақпараттық бұрыш жасақталып, «Халықты жұмыспен қамту орталығының» мамандары келушілерге тегін кәсіби оқу, тұрақты жұмысқа орналасу, субсидияланатын жұмыс орындарына жолдама алу бойынша кеңестер берді.
Негізінен жаңа бизнес-идеяларды іске асыруға арналған мемлекеттік гранттар қаражаты — қажетті еңбек құралдарын, технологиялық жабдықтарды сатып алу үшін нысаналы мақсатта пайдаланылады. Гранттар — тұтынушылық мақсаттарға, кредит қарыздарын өтеуге, жылжымайтын тұрғын үй сатып алуға және салуға, жер учаскелерін сатып алуға, берілмейді.
Алайда Шымкент қаласында мұндай жағдайлар кездескен. Қазірг таңда бизнес бастауға берілген ақшаны мақсатсыз жұмсағандардан қаржыны қайтару жұмыстары жүргізілуде.
Айта кетейік, өткен жылы қаламызда 1 мыңнан астам адам жаңа бизнес идеяларды жүзеге асыру үшін қайтарымсыз гранттарды жеңіп алған. Ал, 2 мыңнан астам адам тегін кәсіби оқуға жіберілген. Мемлекет тарапынан берілетін қолдау шаралары биыл да өз жалғасын табуда. Қала бойынша 447 адамға 400 АЕК дейінгі мөлшерде қайтарымсыз грант беру жоспарланып отыр.
