Отандық тауар өндірушілер Шымкентте бас қосты. Мақсат — халыққа өңірде шығарылатын тауарларды таныстыру. Тұрмыстық заттардан бастап, түрлі саланың өнімдері қойылған жәрмеңкеге 100-ден аса компания қатысуда. Тағы бір ерекшелік, 4 аймақтың тауарымен танысып қана қоймай, тиімді бағада сатып алуға мүмкіндік бар.
Жамбыл, Түркістан, Қызылорда облысы мен Шымкенттік кәсіпкерлер мереке қарсаңында өз өнімін халыққа ұсынды. Өңіраралық тауар өндіруші 100-ден аса компанияның — тамақ, медицина, машина жасау, химия, жеңіл өнеркәсіп пен ауыл шаруашылығы саласына қажетті заттарын халық көріп қана қоймай, жәрмеңкеде тиімді бағада ала алады. Шараны ұйымдастырушылар бәсеке, таңдау бар жерде тауардың сапасы жоғары, ал бағасы қолжетімді болатынын айтып, аталған жәрмеңкенің көшпелі түрде ұйымдастырылатынын жеткізді.
Көрме-жәрмеңкеге қойылған тауарлармен мегаполис басшысы да танысты.
Жаңа серіктестіктерге жол ашатын, тұтынушыларға отандық өнімдерді кеңінен таныстыруға мүмкіндік беретін Кәсіпкерлердің ісі алға басса, жергілікті жердің экономикасы да алға жылжиды. Шараға қатысушы Қызылорда облысының кәсіп иесі 2022 жылы химиялық қоспасыз сабын шығарып бастапты. Табиғи таза өнім — қашан да болсын сұранысқа ие емес пе? Қанат Арыстанбектің айтуынша қазіргі таңда тауары аталған аймақтың сауда орындарына қойылып жатыр екен.
Мұндай шаралар өнеркәсіп өнімін арттыруға сеп болады. Мәселен, өткен жылы шаһардың өнеркәсіп өнімінің көлемі 937 млрд теңгеге жеткен. Мегаполисте қазір 2 мыңға жуық өнеркәсіпорны жұмыс істеп тұр. Олардың 80%-ы өңдеу өнеркәсібімен айналысады.
Екі күнге ұласатын көрме-жәрмеңкеде өнімдер нарықтағы бағадан 10-15 пайыз арзан саудаланады, дейді мамандар.
