Қызметте табысқа жетіп, отбасының ұйытқысы болған әйелдер Шымкентте бас қосты. Шырайлы қалада тұңғыш рет ұйымдастырылған SEN қыз-келіншектер форумы: “Өзіңе, отбасыңа, еліңе сен. Сенің қолыңнан бәрі келеді”,- деген ойды жастарға жеткізуді көздеп отыр. Тұщымды ой, пайымды пікір айтылып, үздіктер ойын ортаға салған басқосудың әлқиссасын мегаполис мэрі Мұрат Әйтенов бастап берді.
SEN бірінші қазақстандық жас әйелдер форумы Шымкенттен бастау алды. Қоғамның сан-саласында қызмет етіп жүрген арулар мен форум спикерлерін қала әкімі құттықтап, жас әйелдерді, қыз-келіншектерді өмірде табысқа жетуге ұмтылдыруды көздеген ауқымды шара басталды.
Форум спикерлерінің қатарында киноиндустрия, өнер, медиа, сән әлемі, басқару және кәсіпкерлік саласындағы көшбасшы әйелдер бар. Өнерден үлкен өмірге жол тапқан қазақтың Қыз Жібегі көргені және түйгенімен бөлісті. Өз кезегінде өткен ғасыр мен жаңа заманның қыздарына қатысты ойын білдірді.
- Өмірдің әрін де, нәрін де кіргізетін, тіршілікке мән сыйлайтын абзал жандар, бұл – әйелдер қауымы. Мерекенің бастауы да, шаңырақтың шаттығы да, мейірімнің ұясы да, әсемдіктің қайнар көзі де – Сіздер. Қазақ қыздарының тарихта қалдырған ізі аз емес. Міне, осындай ардақты аруларымыздың даңқты жолын Сіздер абыроймен жалғап келесіздер, – деген Мұрат Дүйсенбекұлы Шымкент қаласында әйелдер қауымы үшін жаңа мүмкіндіктерге кеңінен жол ашылғанын атап өтті.
SEN форумының міндеті – әйелдердің алға қойған мақсаттарына жетудегі әлеуетін толықтай ашуға көмектесу. Сонымен қатар олардың өзара танысып, тәжірибе алмасуына қолайлы алаң ұсыну. Түрлі жастағы, әрқилы саладағы арулардың бір ортаға топтасып, әңгімелесуі, тәжірибе алмасуы — жеке тұрғыдан және шығармашылық дамуға сеп болады дейді, Қазақстанның еңбек сіңірген әртісі Майра Мұхамедқызы.
Нәзік жандыларға серпін әкелген форум мұнымен тоқтамайды. Алдағы уақытта жалғасын тауып, бүгінгі жиында белсенді болған үздіктер шет елге барып, шеберлік сыныптарына қатысатын болады. Әйел үшін ең маңыздысы — жүрек тыныштығы деген форумның модераторы, белгілі тележүргізуші Ләйлә Сұлтанқызы өз ойымен бөлісіп, мерекемен құттықтады:
— Негізі әйел адамдарға арналған форумдар тек мереке қарсаңында, атаулы датада ғана емес, жыл он екі ай, белгілі бір мерзімде жүйелі түрде өтіп тұрса дұрыс болар еді. Көп жағдайда форумға белгілі бір спикерлер үшін, өзімізге керектіні алуға барамыз. Үйренсек, тәжірибе алмассақ дейміз. Бұл форумның да ерекшелігі сол. Қоғамның сан саласында жүрген нәзік те батыр жандардың Жаңа Қазақстанды құруда өзіндік орны бар екендігін көрсетіп жатыр.
Форум — Қазақстандағы жас әйелдердің дамуына қолдау көрсету бағытындағы нақты қадам болмақ. Сондай-ақ, өзі қалаған жұмысын бастауға алғашқы қадам жасаған қатысушылардың өз күші мен мүмкіндіктеріне деген сенімін нығайтуға сеп болды.
