Елімізде жастар туралы заң қабылданбақ. Бұл мәселе Парламент Мәжілісінде талқыланып, Сенаттың қарауына жіберілген. Дәл осылай деген ақпарат министрі Дархан Қыдырәлі Шымкент жұртшылығымен кездесуінде мәлімдеді. Сондай-ақ, ол телевизия саласында сериалдар бойынша көркемдік комиссия құру жоспарымен бөлісті.
Үшінші мегаполиске ат басын бұрған министр жұмыс сапарының соңында қала жұртшылығымен жүздесті. Кездесуге келгендердің қатарында қоғам белсенділері, үкіметтік емес ұйым өкілдері мен жастар, студенттер бар. Қатысушылардың барлығы дерлік ведомства басшысына бүгінгі қоғамдағы өзекті жайттарды айтуға оқталып, көкейлерінде жүрген сауалдары сайрап тұр. Әсіресе, кездесуге келген студенттер Президент Жолдауында айтылған жастарға жеңілдетілген пайызбен берілетін несие мен жастардың жас шегін 35 жасқа дейін көтеру тақырыбын ортаға салды.
Министр Дархан Қыдырәлі несие мәселесі қаржы ұйымдарымен бірге шешіліп жатқанын айтып, 35 жасқа дейін жоғарылату жаңалығы талқыланып жатқанын, болжам бойынша, келесі жылдың басынан іске асырылуы мүмкін екенін жеткізді.
Сонымен қатар, Дархан Қуандықұлы еліміздегі қоғамның дамуы мен ақпарат, медиа саласының біте қайнасып жатқанына тоқтала кетті. Оның ішінде журналистің мәртебесін көтеру, жарнама, БАҚ-тарды субсидиялау сияқты ауқымды тақырыптар бар.
Министрге сұрақ қою жағы мұнымен аяқталған жоқ. Бірі фейк пен шынайы ақпаратты ажырату жолдары, министрдің дебаттар мен түрлі пікірталастың азаматтық қоғам дамуындағы орны туралы көзқарасын сұраса, ал, кейбір жастар министрдің еңбек жолы туралы толығырақ білгісі келетіндерін жеткізді.
Дархан Қуандықұлы еңбек жолын оқытушылықтан бастағанын айта келе, ұстаз мамандығын қатты қадірлейтінін атап өтті. Жалпы, қойылған сұрақ аз болған жоқ. Тек кездесу соңында еліміздің болашағын құрайтын жастарға аудиторияны шынайы ақпарат іздеуге үйрету, медиа сауатын арттыру, жалған деректі тексерілген ақпараттан ажырата білуге үйрету керектігін жеткізді.
