Еліміздің үшінші мегаполисіне Қ.А.Яссауи ілімін жалғастырушы, түрік жұртына танымал ақын-жазушы Юнус Эмренің ескерткіші қойылды. Оның өлеңдері ғасырлар бойы құмарта, ғибыратпен оқылған. Орталық Азия халқы үшін Ахмед Яссауи қандай орында тұрса, Юнус Эмре де түркиялықтар мен балқандықтар үшін сондай қадірлі.
Қазақстан мен Түркия арасындағы ынтымақтасық пен бауырластықты нығайтқан кезекті кездесу шырайлы Шымқалада түндігін түрді. Ауқымды жиынға шаһар басшысы Мұрат Әйтенов,Түркия Республикасының сыртқы істер министрі Мевлют Чавушоглу, Түркия Республикасының Шымкент қаласындағы Құрметті Консулдығының құрметті Консулы Асанов Латипша Қаймаханұлы, БАҚ өкілдері мен қала тұрғындары қатысты.
Жиында сөз алған шаһар басшысы жазушы Юнус Эмренің шығармашылары мен өмір жолына тоқталды. “Ю.Эмре бізге Қожа Ахмет Яссауидың сопылық ілімін жалғастырушы ретінде белгілі автор. Оның шығармалары сүйіспеншілік пен мейірімділікке негізделген. Түркі жұртына танымал “Көк түрік” деп рух берген Мағжан Жұмабаевтың шығармалары да Юнус Эмре есімімен тығыз байланысты”,-деді М.Әйтенов.
Салтанатты жиынға қатысқан мәртебелі меймандар алдымен түркі жұртына танымал шайырдың ескерткішіне гүл шоқтарын қойды. Мұнан соң Түркия Республикасының құрметті консулдығының лентасын қиды. Мұндай байланыс екі ел арасындағы достық қарым-қатынасты нығайтумен бірге сауда-экономикалық қатынастарды арттыра түспек. Бұл тұста туризім саласының дамуына да қолайлы жағдай жасалады.
Шаһар басшысы Қазақстан Республикасы мен Туркия Республикасы Президенттерінің жыл сайынғы кездесулері достық пен мемлекет аралық қатынастардың беріктігін де тілге тиек етті. Сонымен қатар ол түбі бір түркі жұртының тарихы мен мәдениетінің және рухани байланыстарына негізделген қазақ-түрік достығының дәлелі ретінде Шымкент қаласының Измир, Ескишехир, Адана қалаларымен достық байланыс орнатқанын да атап өтті.
Түркия елімен стратегиялық жоспарлардың, сауда-экономикалық қарым-қатынас пен бірлескен жобалардың жаңа белеске көтерілетініне сенім білдірген қала әкімі Шымкент қаласы мен Түркия Республикасы арасындағы бауырластықтың нығаюына үлкен үлес қосып жүрген Түркия Республикасының Шымкент қаласындағы Құрметті Консулдықтың құрметті Консулы Латипша Қаймаханұлының атқарған еңбегін ескерусіз қалдырмады.
Сөз соңында М.Дүйсенбекұлы жиылған жұртқа ақжарма тілегін жолдап, зор денсаулық, берекелі табыс, бақ-береке тіледі.
