Үшінші мегополистің ЭКОНОМИКАЛЫҚ ДАМУЫНА ТАРТЫЛҒАН ИНВЕСТИЦИЯ КӨЛЕМІ 20 ПАЙЫЗҒА АРТҚАН. Бұл туралы Шымкент қаласы кәсіпкерлік, индустриалды-инновациялық даму басқармасының басшысы мәлімдеді. Береке Дүйсебековтың сөзінше, Жалпы өнеркәсіпте өндірілген өнім көлемі 666,4 млрд. теңгені құрап, өткен жылдың тиісті кезеңімен салыстырғанда нақты көлем индексі 6,7 пайызға ұлғайған.
Басқарма басшысының ақпаратына сәйкес, шағын және орта бизнес субъектілерінің саны 101 мың бірлікті құрап, өткен жылмен салыстырғанда 39 пайызға артқан. Ал бөлшек сауда көлемі 417,9 млрд. теңгеге жетіп, ағымдағы жылы 11,5 пайызға ұлғайған. Жалпы 2022-2025 жылдар аралығында 622 млрд. теңгеге 8,3 мың жұмыс орнын құрумен 66 жобаның пулы жасақталған. Оның ішінде, 2022 жылы 51,4 млрд. теңгеге 1 мыңнан астам жаңа жұмыс орнын құрумен 14 инвестициялық жобаны іске қосу жоспарланған. Бүгінгі таңға жалпы құны 29,2 млрд. теңгені құрайтын 520 жаңа жұмыс орны бар 6 инвестициялық жоба іске асырылып отыр. Сондай-ақ, 2022-2026 жылдары жалпы құны 2,6 трлн. теңгені құрайтын 20 мыңнан аса жаңа жұмыс орнымен 283 инвестициялық жобаның пулы жасақталған. Оның ішінде, биылғы жылдың соңына дейін 173,1 млрд. теңгеге 50 инвестициялық жобаны жүзеге асыру жоспарланған. Шымкент қаласының 2021-2025 жылдарға арналған даму жоспарында аталған басқармаға белгіленген 6 нысаналы индикатордың есепті мерзімдегі қорытындысы бойынша: Өңдеу өнеркәсібіндегі өндіріс көлемі 590,4 млрд. теңгені құрап, өткен жылдың тиісті кезеңімен салыстырғанда нақты көлем индексі 8,1 пайызды құрап отыр. Мұнай-газ-химия өнімдерін өндіретін кәсіпорындар есепті кезеңде 43,5 мың тоннаны шығарды, ал бұл жылдық жоспардың 87 пайызын құрайды.
Айта кету керек, қазіргі таңда жалпы аумағы 749 га құрайтын «Жұлдыз» индустриялық аймағын құру, «Оңтүстік» арнайы экономикалық аймағын қосымша кеңейту, «Бозарық» агро-индустриялық аймағын құру және Көлік-логистикалық аймағын қосымша 136 га-ға кеңейту жұмыстары жүргізілуде.
