БІЛІКТІ МАМАНДАРДЫҢ ҚАТАРЫ АРТАДЫ

Шымкенттік 210-ға жуық дәрігер шетелге барып білімін арттырған. Оған жергілікті бюджеттен 34 млн теңгеге жуық қаржы бөлінген.Бұл жайында қалалық денсаулық сақтау басқармасының басшысы Нұрлыбек Асылбеков баспасөз брифингінде мәлімдеді. Оның айтуынша мамандар Ресей, Беларусь мемлекеттерінде тәлім алған.

Біліктілікті көтермей сапа артпайды. Бәскеге қабілетті болу үшін дәрігерлер білімін жиі жетілдіріп отыруы қажет. Осыған сәйкес бүгінде мегаполисіміздегі 2930 маман білімін шыңдаған. Қалалық денсаулық сақтау басқармасының басшысы Нұрлыбек Асылбекұлының айтуынша алдағы келе жатқан қазан айында  неонатолог, реабилитолог, акушер гинеколог сынды 30 ақ халатты Литва еліне барып, білімдерін арттырмақ.

Мегапоисіміз бала туу көрсеткіші бойынша алдыңғы қатарда екенін ескерсек кезек мәселесін шешу  басқарманың басты мақсаты. Сапалы медициналық қызметке қол жеткізу еш кедергісіз жүзеге асуы тиіс. Осыған орай 2025 жылға дейін қаламыздағы емханалардың саны 50-ге жетпек. Қазіргі таңда шаһарымызда 44 емхана жүйелі жұмыс істеуде. Оның 13-і мемлекеттік болса, 31- жеке меншікке тиесілі.

Сондай-ақ баспасөз брифингінде ақ халаттылардың айлық табысы артатыны мәлім болды.Дәрігерлердің жалақысы 30 пайызға артса, орта буын қызметкерлерінікі 20 пайызға өспек.