Еліміздің барлық мектептерінде бүгін жаңа оқу жылының алғашқы қоңырауы соғылды. Білім саласына енген жаңашылдықты оңтайлы пайдаланып жатқан №90 мектеп те салтанатты шараны атап өтті. Республикадағы үздік 100 мектептің тізіміне енген оқу ошағын 234 бүлдіршін аттап отыр. Сондай-ақ, осы жылы аталған мектептің алғашқы түлектері түлеп ұшады екен.
1-қыркүйек білім күнінің бастауын барлық мектеп Әнұранмен бастады. Мегаполистегі №90 дарынды балаларға арналған мамандандырылған мектеп-гимназиясындағы жиынға мектеп табалдырығын аттаған бүлдіршіндер, жас түлектер, ата-аналар мен мектеп ұжымы қатысты.
Республикалық, халықаралық пән олимпиадалары мен түрлі байқаулардан жүлдегер атанып жүрген білім ошағы үздіктер қатарында. Еліміз бойынша 8 мыңға жуық оқу ұясы болса, сол тізімнің 37-ші орнында тұр. Мектеп басшысы жаңа оқу жылына сақадай сай екенін, білім алуға керек басты құрал — оқулықтың жеткілікті екенін айтады.
Мектеп табалдырығынан тарыдай болып аттаған кішкентай бүлдіршіндердің саны артқан. 234 бала 1-сыныпқа қабылданды. Жалпы Шымкент қаласы бойынша 2021-2022 оқу жылында 25 мың бөбек мектепке келсе, биыл ол цифрға тағы 3 мың бала қосылыпты. Ата-ана үшін перзентінің оң-солын танып, мектепке білім алуға барғанынан артық бақыт бар ма? Әсіресе, алғашқы сыныпқа тұңғышын алып келген аналар әрі қуанып, әрі толқып тұр.
№90 мектеп-гимназиясының құрылғанына биыл 10 жыл. Яғни, 2022-2023 оқу жылында бұл мектептің алғашқы қарлығаштары алтын ұясымен қоштасады. Осы орайда бітіруші сынып түлектеріне артылар жүктің салмағы ауыр. Алғашқы қоңырау соғылды. Кезекті жаңа оқу жылында оқушылар білім алуға, ұстаздар саналы ұрпақ тәрбиелеуге қызметтеріне кірісті.
