2024 жылы Шымкент қаласы толығымен сапалы интернетпен қамтамасыз етіледі. Мұндай үрдіс біртіндеп жүзеге аспақ. Мәселен, өткен жылы 14 елді мекенге базалық станция орнатылса, биыл интернет сапасы төмен 12 елді мекенге базалық станция қойылды. Ал 2023 жылы 11 елді мекеннің аумағы қамтылу көзделуде, солай мобильді интернет желісімен қамту үлесін 95 пайызға жеткізу жоспарланған.
Бұл туралы өткен аптада қала әкіміне бірінші жартыжылдықта атқарылған жұмыстар бойынша есеп берген цифрландыру басқармасының басшысы Ә.Әбдіраханов баяндады.
Жуырда Мемлекет басшысы «Қазақстан Республикасының кейбір заңнамалық актілеріне инновацияларды ынталандыру, цифрландыруды, ақпараттық қауіпсіздікті дамыту және білім беру мәселелері бойынша өзгерістер мен толықтырулар енгізу туралы» Қазақстан Республикасының Заңына қол қойды.
Заңда цифрландыруды, инновацияларды дамытуды ынталандыратын жаңа нормалар қарастырылған.
Қазақстан Республикасы Президентінің «Мемлекеттік аппараттың қызметін бюрократиядан арылту бойынша іс-шаралар туралы» Жарлығын жүзеге асыру үшін Заңға цифрлық трансформация енгізілді. Онда неғұрлым тиімді үдерістерді артық шығынсыз енгізу, ауыр және бюрократияға толы бизнес-процестерді жай ғана автоматтандырмай, оларды қайта жобалап, барынша сапалы ету қарастырылған.
Басқарма басшысының айтуынша осы жылға 71 мың қала тұрғынын қамтитын 12 аумаққа базалық станция орнатылу жоспарға қойылған болса, бүгінде олар бойынша жер телімдері анықталып, инвесторларға ұсынылған. Қазір бетон құю жұмыстары жүргізілуде. Маятас, Елтай, Тоғыс, Бозарықта жеке нысан иелерімен келісу арқылы базалық станция орнатылып, іске қосылды.
Ал, оптикалық интернет қамту үлесін 75 пайызға жеткізу межеленген. Қаладан шалғай орналасқан 15 елдімекенге талшықты оптика желісі қойылады.
ХХІ ғасыр ақпараттық – технологиялық сауаттылықты қажет ететін кезең болса, өскелең ұрпақты технологиялық біліммен қамтамасыз ету өзекті мәселеге айналып отыр. Цифрлік сауаттылық — бұл адам өмірінің барлық салаларында цифрлік технологияларды сенімді, тиімді қолдануға дайындығы және қабілеті. Осы технологияны қолдану арқылы халықтың өмір сапасын арттыруға жол ашып отыр. Мемлекет басшысы атап көрсеткендей, елді цифрландыру – бұл мақсат емес, бұл – Қазақстанның абсолюттік артықшылыққа қол жеткізу құралы. Бүкіл процесс жүйелілікті, реттілікті және кешенді тәсілді талап етеді.
Бүгінде Шымкент қаласында мұндай үрдіс кезең-кезеңімен жүзеге асуда. Осыдан біраз жыл бұрын мектеп жасындағы балаларға тегін IT сауаттылығын арттыру мақсатында курстар ұйымдастырылып бірнеше бағыт бойынша білім берді. Ал бүгінде тұрғындардың IT сауаттылығын арттыру мақсатында «CIFRO» және робопарк бағдарламалау мектептері ашылды. Онлайн платформа веб сайттарды әзірлеу, ІОS, андройд платформасында қосымшалар әзірлеу, анимация жасау, ойындар әзірлеу секілді курстар оқытылуда.
Есепті тыңдаған қала әкімі М.Әйтенов салаға тартылатын инвестиция көлемін арттыруды, интернет күшін жоғарылату бойынша қосымша жоспар жасауды тапсырды.
