ШЫМКЕНТ ТЕМІРЖОЛ ЕМХАНАСЫ ЖАҢАРДЫ

Шымкент теміржол емханасы бір ғасырға жуық тарихы бар үшінші мегаполистегі әлеуметтік маңызға ие медициналық мекеме. 1931 жылы ашылған медициналық ұйымда қазіргі таңда 20 мыңнан аса жергілікті тұрғын тіркеуде тұр. Аталған емдеу мекемесі соңғы жылы күрделі жөндеуден өтіп, емхананың материалдық-техникалық базасы жаңарды. Бүгін міне, тіпті атауына дейін «PARK HEALTH» болып өзгерген медициналық клиника қала тұрғындарына есігін айқара ашты.

Күрделі жөндеуден соң емхананың тіркеу орны, дәрігерлер қабылдау, егу, күндізгі стационар, процедуралық кабинеттер және де басқа медициналық қызмет көрсету санитарлық-эпидемиологиялық талаптарға сай, заманауи үлгіде қайта жасақталып, жұмыс жүргізуде. Пациенттерге салауатты өмір салтын насихаттау және әлеуметтік- психологиялық қолдау көрсету бағыттары да жақсарған. Сондай-ақ, жергілікті дәрігерлердің білімін жетілдіру мен тәжірибе алмасу мақсатында медициналық жоғарғы оқу орындарымен бірлескен іс-шаралар да жиі өткізіліп тұрады.

Шаһарда денсаулық саласындағы басымдықтарға осылайша көңіл бөлініп келеді. Салтанатты шара барысында Шымкент қаласының денсаулық сақтау басқармасы мен қоғамдық медициналық сақтандыру қорының басшылары мамандарға ұлт денсаулығын қорғау ісінде ең үздік көрсеткіштерге қол жеткізуді тіледі.