Ұлы дала перзенті, есімі Қазақ еліне һәм Орта Азия мен Еуропаға мәшһүр жерлесіміз – Қазақстан Республикасы Мемлекеттік сыйлығының және халықаралық ПЕН клуб пен Платиналы «Тарлан» сыйлықтарының иегері, белгілі қоғам қайраткері, драматург-жазушы Дулат Исабеков туған жерінде ардагерлер қауымымен кездесті. Белгілі қаламгер 1942 жылы нақ осы Арыс өңірінде дүниеге келген.
Ол 1967-68 жылдары Қазақстан Республикасының Телевизия және радио хабарын тарату жөніндегі мемлекеттік комитетте аға редактор;
•1968 -70 жылдары Қазақ Совет энциклопедиясы бас редакциясында аға ғылыми редактор;
•1971-76 жылдары «Жұлдыз» журналында бөлім меңгерушісі;
•1976-80 жылдары «Жалын» баспасында редакция меңгерушісі;
•1980-88 жылдары Қазақстан Республикасы Мәдениет министрлігі репертуарлық-редакциялық коллегияның бас редакторы;
•1988-97 жылдары Қазақ теледидарының бас редакторы, «Жазушы» баспасының директоры, Қазақстан Жазушылар одағының хатшысы;
•1997 жылдан Қазақстан Республикасы Мәдениеттану ғылым зерттеу институтының директоры, «Мәдениет» журналының бас редакторы қызметтерін атқарды.
Жазушының алғашқы әңгімесі «Жолда», «Замандастар» атты жинақта 1963 жылы жарияланды. Кейін «Бекет» (1966), «Ащы бал» (1969), «Мазасыз күндер», (1970), «Қара шаңырақ» (1973), «Тіршілік» (1975) повестер мен әңгімелер жинақтары, «Қарғын» (1980) романы басылды. Таңдамалы повестері «Екі жиырма» (1983) деген атпен жарық көрді. Бірқатар шығармалары орыс тілінде аударылып, «Полынь» (1978), «Отчий дом» (1979), «Смятение» (1986), «Новоселье в старом доме» (1986) деген атпен басылды. Жекелеген туындылары венгр, неміс, поляк, чех тілдерінде жарияланды.
Туған жердегі кездесу барысында қарымды қаламгер Арыс қаласында жаңадан ашылған «Ардагерлер үйінің» жұмысымен танысса, келелі кездесу шығармашылық тақырыбындағы жиынға ұласты.
