Ұшса қыранның қанаты талатын, жүгірсе құланның тұяғы тозатын қазақ даласының қай өлкесі де қастерлі, қай өлкесі де қасиетті. «Қазақ Хандығының 550 жылдық» мерейтойына арналған «Айғақ» телеарнасының телеэкспедициясы бұл жолы еліміздің оңтүстік-шығысы арқылы тарихтың талай таңбасы жатқан Шығыс Қазақстан өңіріне жол тартқанынан хабардарсыздар. Сапар барысында Жамбыл облысының Қордай өлкесінде орын тепкен батырларымыздың бірі, шапқыншылық заманда жауға қасқая қарсы тұрған бірегей тұлға Өтеген батырдың ескерткішіне аялдап тәу етті. Тас мүсінге гүл шоқтарын қойып, қазақ зиялыларының есімін де естен шығармады. Алматы қаласындағы Орталық зиратта мәңгілік жаны жай тапқан біртума таланттарымыз жазушы Мұхтар Әуезов, ғалым Қаныш Сәтпаев, режиссер Шәкен Айманов, дипломат-ғалым Төлеген Тәжібаев, жазушы Саттар Ерубаев пен жауынгер ақын Қасым Аманжоловтардың жерленген жеріне барып тағзым жасады.
Айдын Айымбетов – Тәуелсіз Қазақстанның тұңғыш ғарышкері. Қазақ атынан үшінші болып ғарышқа сапар шексе де, Қазақстан азаматтығымен алғаш ұшып отыр. 2 қыркүйек күні халыақаралық ғарыш стансасына аттанған экипаж мүшелері 12 қыркүйекте аман-есен елге оралды. Тәуелсіз Қазақстанның бүгінгі батырының туып өскен жері Талдықорған қаласынан арнамыз арнайы түсірілім жасап, Айдын Айымбетов білім алған орта мектептің ұжымымен кездесті. Сондай-ақ, өзі маманданған Жоғары оқу орыны Ілияс Жансүгіров атындағы Жетісу мемлекеттік университетінің «Физика-информатика» факультетінде болып, ұстаздарымен жолықты. Ғарышкер турасында ой-пікірін жеткізген мұғалімдер сұхбатын арнайы хабар барысында көретін боласыздар.
