Бейсенбі күні Шымкентте Республикада теңдесі жоқ 12 қабатты студенттер үйі ашылды. Сексен жылға жуық тарихы бар Оңтүстік Қазақстан мемлекеттік педагогикалық институты жанынан бой тіктеген ғимарат 500 студентке арналып салынған. Құны 1,2 миллиард теңгені құрайды. Болашақ педагог мамандығын таңдаған студент жастардың көптен күткен қуанышын бөлісуге еліміздің бас ұстазы, білім және ғылым министрі Аслан Сәрінжіпов арнайы қатысты.
Білім және ғылым министрілігі таратқан мәлімет бойынша Республика студенттерінің 60 пайызы жатақханамен қамтылған. Бұл пайызды арттыру мақсатында биылғы жылы 6 бірдей студенттер үйі еліміздің бірқатар облыстарында бой көтеруде. Солардың ішінде алғаш болып құрылысы аяқталып, салтанатты түрде қолданысқа берілгені Оңтүстік Қазақстан мемлекеттік педагогикалық институты жанынан салынған ғимарат. 12 қабатты, 500 орынға лайықталған студенттері үйінің ішінде кітапхана, асхана, арнайы медициналық кабинеттер, тоңазытқыш, лифт керек десеңіз шаштараз бен химиялық тазарту бөлмелері де табылады. Әр жатын бөлмеде екі студенттен орналасады. Бұл қызметтерге шәкірттердің барлығы бірдей қол жеткізе бермейді. Яғни студент міндетті түрде мемлекеттік грант иегері болуы тиіс. Жалпы құрылыс жұмыстары 1 жыл 5 ай мерзімде аяқталып отыр. Үшінші қала Шымшаһардың қақ төрінен бой көтерген ғимарат расында да студент жастардың көптен күткен қуанышы. Бұл ретте келешекте мектептің шамшырағына айналып, ұрпақ тәрбиелейтін болашақ ұстаздарға артылған сенім жүгінің жеңіл еместігін аңғартады. Шынында білім саласының ғылым мен техника қарыштап дамыған сайын түрленіп отыратындығы сіз бен бізге жасырын емес. Институт ректоры Оңалбай Аяшев жаңа студенттер үйі өзге облыстардан келіп білім алатын жастарды да алға жетелейтін «Арман үйі» деп баға берді.
