Түркістан облысындағы шаруалар қиындыққа тап болуы мүмкін

Биыл Түркістан облысындағы шаруалардың жағдайы тіптен қиын болмақ. Жермен жан баққан жұрт құрғақшылыққа тап болуы мүмкін. Өзекті мәселе ҚР Экология, геология және табиғи ресурстар вице-министрі Серік Қожаниязовтың қатысуымен өткен селекторлық жиында жан-жақты талқыланды. Одан бөлек ала жаздай атыз жағалағандар да каналдардың құрылысы сақалды құрылысқа айналғандықтан ағын суды тиісінше ала алмай қырғи қабақ болып отыр. Вице-министрдің айтуынша биыл жағдай айтарлықтай ауыр болмақ. Әсіресе салмақ шаруаларға түспек. Ал, статистикаға көз жүгіртсек, бұл жағдай әр 5-6 жыл сайын қайталануда. Салдарынан орақ науқаны ойдағыдай орындалмауы мүмкін. Дегенмен табиғи құбылысқа тосқауыл бар ма? Қолдан келері тек шаруаларды суды аз қажет ететін өнім түрлерін өндіруге шақыру дейді,- вице-министр.

Жиында сөз алған облыстық ауыл шаруашылығы басқармасының басшысы Нұрбек Бадырақов Түркістан облысындағы су шаруашылығының жағдайын баяндады. Жалпы облыста суармалы жердің көлемі 486 мың га. Яғни республика бойынша 3/1 бөлігін құрайды. Сондай-ақ, аймақтағы ағын су тапшылығының алдын алуы үшін атқарылар жұмыстарды тізбектеп шықты.
Мақтаарал және Жетісай аудандарында 310 мың халық тұрады. Халықтың басты күнкөрісі ауыл шаруашылығы. Мұндағы суармалы егістіктің 40 пайызы орта және өте күшті тұзданған. Сол себептен егістіктің 60 пайыздан астамы тұзданған жерге төзімді мақта дақылдары егілуде. Тиісінше жыл сайын түрлі зиянкестер мен ауру түрлері көбеюде дейді басқарма басшысы. Мәселен өнім көлемі де төмендеп жатыр. Нәтижесінде аталған екі ауданның ауыл шаруашылығындағы еңбек өнімділігі облыс бойынша ең төменгі көрсеткішті құрап отыр. Өзекті мәселелер қатарында сақалды құрылысқа айналған каналдар жайы да айтылды. Атап айтқанда, Бөген қашыртқысының құрылыс жұмыстары аяқсыз қалған. Түркістан магистральды каналының да күйі осыған саяды. Одан бөлек, басқарма басшысы сөз барысында суды үнемдеуші технологияларды қолданатын шаруаларға басымдық беруді ұсынды. Тиісінше суды аз қажет ететін өнім түрлерін де арттыру көзделіп отыр.

Облыс аумағындағы кейбір аудандар әзірден-ақ су тапшылығынан зардап шегуде. Вице-министрдің қатысуымен өткен селекторлық жиынға онлайн форматта қосылған жауапты мамандар осылай деп дабыл қақты. Тіпті ағын суды былай қойғанда, ауыз сусыз отырған елдімекендер де бар. Ағын су тапшылығына «Казгидромет» мамандарының да айтары бар. Анық болғандай ағымдағы жылы жауған қар мен жауын-шашын тиісті мөлшерді қамти алмайды. Казгидромет мамандарының болжамы бойынша наурыз айында Түркістан облысының таулы аймақтарында жауын-шашын мөлшер шамасынан көп күтілуде. Алайда бұдан келіп кетер пайда жоқ дейді. Сонымен қатар, таудың ұшар басындағы қар көлемі өте аз. Сол себептен де биыл таудан келер ағын судан тапшылық туындауы мүмкін.
Жиынды қорытындылаған вице-министр Серік Қожаниязов сөз соңында биыл шаруалардың судан қиналатынын ашық айтып, ағын суды үнемдеуге шақырды.

Айғақ-ақпарат