ОТАНДЫҚ ӨНДІРІС ШИКІЗАТҚА ТӘУЕЛДІ

«Үкіметтің басты мақсаты – ішкі нарықты қорғап, ұлттық экономиканы дамыту». Осылай деген Өмірзақ Естайұлы өңірде импорттың орнын басуға оң әсерін тигізетін «Түркістан Текстиль» тігін фабрикасының жұмыс барысымен танысты. 2020 жылдың соңында іске қосылған фабрика қазіргі таңда 72 адамды жұмыспен қамтып, әлеуметтің әлеуетін арттырып отыр.  Түркістан индустриалдық аймағында орналасқан «Түркістан Текстиль» тігін фабрикасының қуаттылығы айына 13-15 мың дана өнім өндіруге қауқарлы. Тігін цехына сапарлатқан облыс әкімі кәсіпорынның тынысымен танысып, атқарылған жұмыстарды саралап көрді. Сондай-ақ, импортқа деген тәуелділіктен арылып, отандық өндірісті барынша дамыту керектігін мәлімдеді.Бұл фабриканың басқалардан ерекшелігі сол – сапасы жоғары, бағасы арзан. Ең бастысы әлеуметтік маңызды жоба. Облыс әкімінің орынбасары осылай дейді. Тағы да бір айта кетерлігі нарыққа тез бейімделіп, тұтынушылардың құбылмалы сұранысын ескере отырып, ассортименттің тез өзгеруіне бейімделген екен. Алайда өнім отандық болғанымен негізгі шикізат көзі шет елден тасымалдануда. Көпбалалы және аз қамтылған отбасылардағы әйел азаматшаларды жұмыспен қамту мақсатында басталған әлеуметтік жоба ресми түрде 72 адамды жұмыспен қамтасыз етуде. Тігіншілерге қояр талап тек сапа, жылдамдық және жауапкершілік. Жас мөлшері шектелмеген. Ал жұмыс кестесі таңғы сағат 09:00-ден бастап кешкі 18:00-ге дейін. Айта кетерлік жайт мұнда мүмкіндігі шектеулі жандар да жұмыс істеп, еңбек етуде. Сандуғаш Құлымбетова соңғы 17 жыл бойы Түркістан қаласында тұрып келеді. Негізгі мамандығына бұл жұмыс сай келмесе де, әрекетке берекет деп іске кіріскен.Сонымен қатар, мұнда теорияны өндіріспен ұштастыра оқыту бойынша Түркістан көпсалалы қолөнер колледжінің білім алушылары тәжірибе жинақтауда. Назерке Әбдікерім аталған білім мекемесінің 4 курс студенті. Жас маман мұндай мүмкіндік біз үшін үлкен көмек дейді.

Түркістан облысының спортшылары, медицина қызметкерлері мен мектеп оқушыларының арнайы формалары дәл осындағы тігіншілердің қолынан шығады. Жалпы өндірісте Baoyu және Jack фирмаларының 400-ге жуық заманауи құрал-жабдықтары қолданылуда екен. Айтқандай, аталған индустриалды аймақта бүгінде 83 млрд теңгенің 7 инвестициялық жобасы жүзеге аспақ. Тиісінше 3 мыңға жуық жаңа жұмыс орны ашылады.

Айғақ-ақпарат