Шымкенттің дене шынықтыру және спорт саласына биыл бюджеттен 22 миллиардқа жуық қаржы бөлінді. Оның ішінде бұқаралық спортты дамытуға баса мән беріліп отыр. Спорт инфрақұрылымын дамыту бағытында еліміздегі алғашқы, халықаралық стандартқа сай болатын паралимпиадалық кешеннің де құрылысы басталды.
Шымкентте 22 олимпиадалық, 2 олимпиадалық емес, 2 паралимпиадалық, 1 сурдлимпиадалық және 10 ұлттық спорт түріне басымдық беріліп, дамып келеді. Президент тапсырмасы аясында бұқаралық спорт түрі де дамып келеді. Шаһарда спорттық инфрақұрылымды кеңейтуге де басымдық беріліп отыр. Қазір қалада 877 спорт нысаны бар. Биыл тағы екі нысанның құрылысын бастау жоспарланған. Жаңа нысандардың салынуы тұрғындардың спортпен тұрақты айналысуына мүмкіндік беріп, әсіресе шағынаудандардағы спорт инфрақұрылымын жақсартуға бағытталған. Сонымен қатар, Тұран-2 шағынауданында 60 мың көрерменге арналған жаңа стадионның және паралимпиадалық, сурдлимпиадалық спорт кешенінің құрылысы жүріп жатыр.
Қолданыстағы спорт нысандары да жаңартылады. Биыл бірқатар нысанда ағымдағы және күрделі жөндеу жұмыстарын жүргізу жоспарланған. Бұл жұмыстар спорт ғимараттарының жағдайын жақсартып, тұрғындарға көрсетілетін қызмет сапасын арттыруға бағытталмақ. Атқарылған жұмыстармен қатар, қала орталығынан шалғай орналасқан елді мекендердегі спорт инфрақұрылымын дамыту үшін бес жер телімі заңдастырылған. Алдағы уақытта аталған аумақтарда спорт нысандарын салу мәселесі қаралады.
