Қыстың қамын жазда ойлаған Еңбекші ауданында жылыту маусымына дайындық қарқын алды. Аудан аумағындағы 283 көпқабатты тұрғын үйдің 175-і орталықтандырылған жылу жүйесіне қосылған. Бүгінде оның 134-інде жылу жүйелерін сығымдау жұмыстары толық аяқталды. Бұл – дайындық жұмыстарының 76 пайызы. Қалған нысандардағы жұмыстарды қыркүйек айына дейін аяқтау жоспарланған.
Ауданда 2026–2027 жылдардағы жылыту маусымына дайындық жұмыстары бекітілген жоспарға сәйкес жүргізілуде.Осы орайда көпқабатты тұрғын үйлерде дайындық қызу. Атап айтсақ, инженерлік инфрақұрылым нысандарының техникалық дайындығы тексерілуден өтіп қысқы кезеңге дайындау жұмыстары қолға алынған. Оған қоса аудан аумағына қызмет көрсететін сервистік компаниялар тұрғындармен тиісті келісімшарт жасасып, жылу жүйелерін сығымдау жұмыстарын да жүргізуде.
Сонымен қатар аудан әкімдігі «Қуат жылу орталық-3» мемлекеттік коммуналдық кәсіпорны мен бірлесіп, жылыту маусымына дайындық бойынша іс-шаралар жоспарын бекіткен. Қазір бұл бойынша жылу жүйелеріндегі қысымдау жұмыстарының сапасы тексеріліп, ішкі инженерлік желілерге бақылау жүргізілуде. Тозығы жеткен құбырлар ауыстырылып, сорғы станцияларындағы ескірген жабдықтар жаңғыртылуда.
